ఢిల్లీలో ఘోర ప్రమాదం: సీమాపురిలో కూలిన ఐదు అంతస్తుల భవనం..

న్యూఢిల్లీ: దేశ రాజధాని ఢిల్లీలోని సీమాపురి ప్రాంతంలో భారీ ప్రమాదం చోటుచేసుకుంది. అక్కడ ఉన్న ఓ ఐదు అంతస్తుల భవనం ఉన్నపళంగా కూలిపోవడంతో స్థానికంగా తీవ్ర కలకలం రేగింది. ప్రమాద సమయంలో భవనంలో పలువురు నివాసితులు ఉన్నారని, ప్రస్తుతం వారంతా శిథిలాల కింద చిక్కుకున్నట్లు సమాచారం అందుతోంది.

సమాచారం అందుకున్న వెంటనే అగ్నిమాపక సిబ్బంది, పోలీసులు మరియు విపత్తు ఉపశమన బృందాలు ఘటనా స్థలానికి చేరుకున్నాయి. భవన వ్యర్థాలను తొలిగించి లోపల చిక్కుకున్న వారిని సురక్షితంగా బయటకు తీసేందుకు సహాయక చర్యలు ముమ్మరంగా కొనసాగుతున్నాయి. గాయపడిన వారిని వెంటనే సమీపంలోని ఆసుపత్రులకు తరలించేందుకు అంబులెన్సులను కూడా సిద్ధంగా ఉంచారు. ప్రమాదానికి గల ఖచ్చితమైన కారణాలు ఇంకా తెలియాల్సి ఉంది.