ఢిల్లీ పౌర సమస్యలకు సాంకేతిక పరిష్కారాలు చూపాలి

యూనివర్సిటీలకు ఎల్‌జీ ఆదేశం
సూర్య జాతీయ డెస్క్: దేశ రాజధాని ఢిల్లీ ఎదుర్కొంటున్న ప్రధాన పౌర సమస్యలకు ఆధునిక సాంకేతిక పరిజ్ఞానంతో కూడిన శాశ్వత పరిష్కారాలను అన్వేషించాలని ఢిల్లీ లెఫ్టినెంట్ గవర్నర్ టి.ఎస్. సంధు సాంకేతిక విశ్వవిద్యాలయాలకు సూచించారు. లోక్ నివాస్‌లో నిర్వహించిన నేతాజీ సుభాష్ సాంకేతిక విశ్వవిద్యాలయం ఆరో కోర్టు సమావేశానికి అధ్యక్షత వహించిన ఆయన, కేవలం పరిశోధనా పత్రాలకే పరిమితం కాకుండా వాటిని ఆచరణాత్మక పరిష్కారాలుగా మార్చాలని పిలుపునిచ్చారు. పారిశుధ్యం, ట్రాఫిక్ నిర్వహణ, రహదారుల పునర్నిర్మాణం, వర్షాకాలంలో తలెత్తే వరద ముప్పు వంటి సమస్యలపై ప్రత్యేక దృష్టి సారించి ప్రపంచస్థాయి అత్యుత్తమ విధానాలను విశ్లేషించాలని యూనివర్సిటీ వర్గాలకు స్పష్టం చేశారు.

వికసిత ఢిల్లీ దిశగా వేగంగా ముందుకు సాగాలంటే పరిశోధనల నుంచి ఆచరణాత్మక పరిష్కారాలు, ఆవిష్కరణల నుంచి స్పష్టమైన ప్రభావం చూపించే దిశగా ప్రయాణం సాగాలని లెఫ్టినెంట్ గవర్నర్ ఉద్ఘాటించారు. ఆర్టిఫిషియల్ ఇంటెలిజెన్స్ విద్యను అంతర్జాతీయ ప్రమాణాలకు అనుగుణంగా భవిష్యత్తు అవసరాలకు తగినట్లుగా తీర్చిదిద్దాలని చెప్పారు. ముఖ్యంగా ప్రభుత్వ ఆసుపత్రుల్లో ఏఐ ఆధారిత వైద్య సేవలను అందుబాటులోకి తీసుకురావడం వంటి విప్లవాత్మక మార్పులపై దృష్టి పెట్టాలన్నారు. ఢిల్లీ మున్సిపల్ కార్పొరేషన్, ట్రాఫిక్ పోలీస్, ఆరోగ్య శాఖ, పిడబ్ల్యూడీ, రవాణా శాఖ వంటి ప్రభుత్వ విభాగాల ప్రత్యేక అవసరాలకు అనుగుణంగా సాంకేతిక సహకారాన్ని అందించాలని ఆదేశించారు.

విద్యార్థుల్లో ఉపాధి అవకాశాలను పెంచేందుకు వీలుగా ఏఐ, సైబర్ సెక్యూరిటీ, డిజిటల్ టూల్స్ వంటి ఆధునిక విభాగాల్లో నైపుణ్య శిక్షణా కోర్సులను అందించాలని సూచించారు. జాతీయ, అంతర్జాతీయ స్థాయిలో విశ్వవిద్యాలయ ర్యాంకింగ్స్‌ను మెరుగుపరచుకోవడానికి విదేశీ విద్యాసంస్థలు, ప్రముఖ పరిశ్రమలతో భాగస్వామ్యాన్ని పెంపొందించుకోవాలని పిలుపునిచ్చారు. విద్యార్థులను సామాజిక సేవలో భాగస్వాములను చేస్తూ, దత్తత తీసుకున్న గ్రామాలు మరియు పట్టణ ప్రాంతాల్లో ఉపాధి, ఆర్థిక అవగాహన, క్రీడలను ప్రోత్సహించాలని, పౌర సమస్యల పరిష్కారంలో భాగమయ్యే విద్యార్థులకు ప్రత్యేక బహుమతులు అందించాలని స్పష్టం చేశారు.