ఢిల్లీ స్కూల్లో విద్యార్థిని ఆత్మహత్య: 3 పేజీల లేఖ లభ్యం

సూర్య క్రైమ్ డెస్క్, న్యూఢిల్లీ: దేశ రాజధాని ఢిల్లీలోని ఓ ప్రభుత్వ పాఠశాల ప్రాంగణంలో అత్యంత విషాదకర సంఘటన చోటుచేసుకుంది. తూర్పు ఢిల్లీ పరిధిలోని కృష్ణా నగర్ సర్వోదయ కన్యా విద్యాలయంలో 12వ తరగతి చదువుతున్న బాలిక ఒంటిపై పెట్రోల్ పోసుకుని నిప్పంటించుకుని ప్రాణాలు తీసుకుంది. మధ్యాహ్నం వేళ పాఠశాల గార్డ్ రూమ్ వెనుక భాగంలో మంటలు చెలరేగడాన్ని గమనించిన సిబ్బంది పోలీసులకు సమాచారం అందించారు. ఘటనా స్థలానికి చేరుకున్న పోలీసులు, క్రైమ్ టీమ్ దర్యాప్తు ప్రారంభించి విద్యార్థిని స్కూల్ బ్యాగ్ నుంచి మూడు పేజీల సూసైడ్ నోట్‌ను స్వాధీనం చేసుకున్నారు.

పోలీసులు తెలిపిన ప్రాథమిక వివరాల ప్రకారం, వ్యక్తిగత కారణాలు, ప్రేమ వ్యవహారంలో బ్రేకప్ నేపథ్యంలో తీవ్ర మనస్తాపానికి గురై విద్యార్థిని ఈ కఠిన నిర్ణయం తీసుకున్నట్లు సూసైడ్ నోట్ ద్వారా ప్రాథమికంగా తెలుస్తోంది. అయితే మరణం వెనుక ఏదైనా కుట్ర లేదా ఇతర కారణాలు ఉన్నాయా అనే కోణంలో కుటుంబ సభ్యులు అనుమానాలు వ్యక్తం చేయడంతో అధికారులు అన్ని కోణాల్లోనూ విచారణ జరుపుతున్నారు. పాఠశాల ప్రాంగణంలోకి విద్యార్థిని ఇంధనం ఎలా తీసుకురాగలిగింది, ఘటన సమయంలో భద్రతా సిబ్బంది తీరుపై కూడా సంబంధిత సబ్-డివిజనల్ మేజిస్ట్రేట్ (SDM) బృందం ఆరా తీస్తోంది.