భారత్ రెన్యూవల్ ఎనర్జీ సమ్మిట్‌లో ఉపరాష్ట్రపతి ఉద్ఘాటన
సూర్య జాతీయ డెస్క్ (న్యూఢిల్లీ): శిలాజ ఇంధనాలపై ఆధారపడటాన్ని క్రమంగా తగ్గించుకుంటూ భారతదేశం అనూహ్య ఆర్థిక వృద్ధిని సాధిస్తోందని ఉపరాష్ట్రపతి వెల్లడించారు. దేశంలో నాన్-ఫాసిల్ ఫ్యూయల్ (శిలాజ ఇంధనేతర) ఉత్పాదక సామర్థ్యం 300 గిగావాట్లకు పైగా దాటిందని ఆయన ప్రకటించారు. స్వచ్ఛమైన ఇంధన వనరుల వైపు మళ్లడం ద్వారా దేశంలో చౌకైన విద్యుత్ అందుబాటులోకి రావడంతో పాటు పారిశ్రామిక ఖర్చులు తగ్గుతున్నాయని, పెద్ద ఎత్తున ఉద్యోగ అవకాశాలు సృష్టింపబడుతూ దిగుమతి బిల్లులు గణనీయంగా తగ్గుతున్నాయని పేర్కొన్నారు.
భారతదేశం 2047 నాటికి అభివృద్ధి చెందిన దేశంగా అవతరించాలని, 2070 నాటికి నెట్-జీరో ఉద్గారాల లక్ష్యాన్ని సాధించాలని నిర్దేశించుకున్నట్లు ఉపరాష్ట్రపతి గుర్తుచేశారు. రాబోయే దశాబ్దంలో విద్యుత్ డిమాండ్ భారీగా పెరిగే అవకాశం ఉందని, ఈ అవసరాలను తీర్చేందుకు పర్యావరణాన్ని రక్షించుకుంటూనే పరిశుభ్రమైన, నమ్మకమైన ఇంధనాన్ని అందించడమే లక్ష్యంగా ముందుకు సాగుతున్నామని తెలిపారు. అంతర్జాతీయ సమాజం కలిసికట్టుగా అడుగులు వేస్తేనే ప్రపంచానికి కావాల్సిన హరిత శక్తి భద్రత సాధ్యమవుతుందని ఆయన పిలుపునిచ్చారు.
ఈ సదస్సులో కేంద్ర నూతన, పునరుత్పాదక ఇంధన శాఖ మంత్రి ప్రహ్లాద్ జోషి మాట్లాడుతూ, గత దశాబ్ద కాలంలో దేశీయ పునరుత్పాదక ఇంధన రంగంలోకి రూ.15 లక్షల కోట్లకు పైగా పెట్టుబడులు వచ్చాయని వెల్లడించారు. ఈ కార్యక్రమంలో ఉత్తమ ప్రతిభ కనబరిచిన వివిధ రాష్ట్రాలు, ప్రభుత్వ శాఖలు, రంగాల వారీగా ప్రముఖులకు ఎక్సెలెన్స్ ఇన్ రెన్యూవల్ ఎనర్జీ అవార్డులు మరియు పీఎం సూర్య ఘర్ అవార్డులను ఉపరాష్ట్రపతి ప్రదానం చేశారు. ఇంధన భద్రతను సాధించే దిశగా కేంద్ర ప్రభుత్వం చేపడుతున్న ఈ చర్యలు దేశ పారిశ్రామిక మరియు ఆర్థిక ప్రగతికి సరికొత్త దిశానిర్దేశం చేస్తున్నాయని నిపుణులు విశ్లేషిస్తున్నారు.
