చాందినీ చౌక్ భవనం కూలిన ఘటనపై తీవ్ర ఆగ్రహం
సూర్య జాతీయ డెస్క్ (న్యూఢిల్లీ): భవనం కూలిపోయిన సమాచారం అందుకున్న వెంటనే సీఎం రేఖా గుప్తా ఉన్నతాధికారులతో అత్యవసర సమీక్ష నిర్వహించి ఘటన స్థలంలో సహాయక చర్యలను వేగవంతం చేశారు. ప్రాణాలు కోల్పోయిన బాధిత కుటుంబాలకు సానుభూతి తెలిపిన ముఖ్యమంత్రి, ప్రమాదంలో గాయపడిన వారికి మెరుగైన ఉచిత వైద్య సహాయం అందించాలని ఆసుపత్రి వర్గాలను ఆదేశించారు. నిబంధనలకు విరుద్ధంగా సరైన భద్రతా చర్యలు తీసుకోకుండా పనులు చేపట్టిన కాంట్రాక్టర్‌పై క్రిమినల్ కేసులు నమోదు చేయాలని ఆదేశించారు.
పాత నగర ప్రాంతాల్లో ఉన్న శిథిలావస్థకు చేరిన భవనాలు మరియు ప్రమాదకరంగా జరిగే నిర్మాణ పనులపై నిరంతరం పర్యవేక్షణ ఉండాలని, బాధ్యతా రాహిత్యంగా వ్యవహరించే అధికారులపై ఊపేక్షించేది లేదని సీఎం హెచ్చరించారు. చావురీ బజార్ ఘటనపై సమగ్ర విచారణ జరిపి నివేదిక సమర్పించాలని ఉన్నత స్థాయి కమిటీని ఆదేశించారు. ఈ పరిణామాల నేపథ్యంలో ఢిల్లీ మున్సిపల్ కార్పొరేషన్ అధికారులు సంబంధిత కాంట్రాక్టర్‌పై కేసు నమోదు చేసి తదుపరి చట్టపరమైన చర్యలను వేగవంతం చేశారు.
ఢిల్లీ వ్యాప్తంగా ఉన్న పాత మరియు ప్రమాదకర నిర్మాణాల భద్రతను సమీక్షించేందుకు ప్రత్యేక తనిఖీలు చేపట్టాలని పాలనా యంత్రాంగం నిర్ణయించింది. ప్రజల ప్రాణాలతో చెలగాటమాడే ఏ ఒక్కరినీ వదిలిపెట్టబోమని, చట్టప్రకారం కఠినంగా శిక్షిస్తామని ప్రభుత్వం స్పష్టం చేసింది. నాణ్యతా ప్రమాణాలు పాటించకుండా నిర్మాణాలు చేపట్టే వారిపై భవిష్యత్తులో కూడా ఇలాంటి కఠిన చర్యలే ఉంటాయని అధికారులు హెచ్చరించారు.
