చీపురుపల్లిలో 74.49 శాతం పోలింగ్

చీపురుపల్లి, సూర్య : చీపురుపల్లిలో 74.49 శాతం పోలింగ్ నమోదు అయ్యింది. మండలంలో మొత్తం ఓటర్లు 49, 469 మంది ఉండగా వారిలో 36,851 మంది ఓటు హక్కు వినియోగించుకున్నారు. మండలంలో 18 ఎంపీటీసీ స్థానాలకు ఒక జెడ్పీటీసీ కి గురువారం 55 పోలింగ్ కేంద్రాల్లో ఎన్నికలు నిర్వహించారు. పీఓ ఏపిఓలు, ఓపీఓ లు కలిపి 425 మంది పోలింగ్ సిబ్బంది విధులు నిర్వహించారు. 
చీపురుపల్లి లో మహిళా ఓటర్లుదే హవా.....
చీపురుపల్లి నియోజకవర్గంలో మహిళా ఓటర్లుదే హవా కొనసాగింది. జడ్పీటీసీ ఎంపీటీసీ స్థానాలకు గురువారం జరిగిన ఎన్నికల్లో చీపురుపల్లి లో 18,937 మంది,  గరివిడిలో 21,033 మంది, గుర్లలో 22,804 మంది, మెరకముడుదాం లో 16,327 మంది మహిళా ఓటర్లు పురుష ఓటర్లు కంటే ఉత్సాహంగా ఎన్నికల్లో పాల్గొని తమ ఓటు హక్కు వినియోగించుకున్నారు. గతం కంటే మహిళల్లో పెరిగిన చైతన్యం ఏ పార్టీకి మేలు జరగనుందోనని పరిశీలకులు అంచనా వేస్తున్నారు.
ఓటు హక్కు వినియోగించుకున్న ముఖ్యులు....
చీపురుపల్లి మండలంలో మాజీ ఎంపీ బెల్లాన చంద్రశేఖర్, జెడ్పీ మాజీ చైర్మన్ మజ్జి శ్రీనివాసరావు, టీడీపీ జిల్లా అధ్యక్షుడు కిమిడి నాగార్జున, మాజీ ఎమ్మెల్యే గద్దె బాబురావులు వారి ఓటు హక్కును వినియోగించుకున్నారు.
పోలింగ్ కేంద్రాలను సందర్శించిన జిల్లా ఎస్పీ...
మండల కేంద్రంలో జెడ్పీ బాలుర ఉన్నత పాఠశాలలో ఏర్పాటు చేసిన పోలింగ్ కేంద్రాలను జిల్లా ఎస్పీ ఏఆర్ దామోదర్ పరిశీలించారు. జిల్లా వ్యాప్తంగా ప్రశాంతంగా ఎన్నికల పోలింగ్ కొనసాగుతుందని తెలిపారు. ఈ సందర్భంగా ఏర్పాటు చేసిన ఆరోగ్య సంరక్షణ శిబిరంలో ఎస్పీ ఏఆర్ దామోదర్ రక్త పరీక్ష చేయించుకున్నారు. ఆయనతో పాటు డీఎస్పీ ఎస్ రాఘవులు, సిఐ జి శంకరరావు ఎస్సై ఉమా వెంకటేశ్వరరావు ఉన్నారు.