ఛత్తీస్గఢ్ను ముంచెత్తిన వరదలు.. తీవ్రంగా స్తంభించిన జనజీవనం
సూర్య జాతీయ డెస్క్: ఛత్తీస్గఢ్ వ్యాప్తంగా గత కొన్ని రోజులుగా కురుస్తున్న భారీ వర్షాలు తీవ్ర వినాశనాన్ని సృష్టిస్తున్నాయి. ఖరూన్, ఇంద్రావతి వంటి ప్రధాన నదులు మరియు స్థానిక వాగులు ప్రమాదకర స్థాయిని దాటి ఉప్పొంగి ప్రవహిస్తుండటంతో రాష్ట్రంలోని రాయ్పూర్, దుర్గ్, బస్తర్, సుక్మా, బీజాపూర్ జిల్లాల్లో వరద పరిస్థితి భయానకంగా మారింది. పలు నదీ పరీవాహక గ్రామాలు, లోతట్టు ప్రాంతాలు పూర్తిగా జలదిగ్బంధంలో చిక్కుకోగా, వరద నీరు భారీగా నివాస గృహాలు, వ్యాపార సముదాయాలు మరియు వేలాది ఎకరాల పంట పొలాల్లోకి చొచ్చుకురావడంతో తీవ్ర ఆస్తి నష్టం సంభవించింది.
వరద ఉధృతికి రాష్ట్రవ్యాప్తంగా రవాణా మరియు రైల్వే వ్యవస్థలు తీవ్రంగా దెబ్బతిన్నాయి. రాయ్పూర్-జగదల్పూర్ జాతీయ రహదారి 30 పైకి భారీగా వరద నీరు చేరడంతో పాటు రాయ్పూర్-దుర్గ్ మధ్య ఉన్న మహాదేవ్ ఘాట్ మార్గం పూర్తిగా మునిగిపోయి వాహనాల రాకపోకలు నిలిచిపోయాయి. దుర్గ్-దల్లిరాజ్హరా రైల్వే సెక్షన్లోని లాటబోర్, గుండర్దేహి స్టేషన్ల మధ్య ట్రాక్లు కుంగిపోవడం మరియు వర్షపు నీరు చేరడంతో పలు రైళ్లను రద్దు చేయగా, మరికొన్ని రైళ్లను పాక్షికంగా నిలిపివేశారు. వేలాది ఎకరాల్లో వరి పంట నీటమునిగి కుళ్లిపోవడంతో రైతాంగం లబోదిబోమంటోంది.
పరిస్థితి తీవ్రతను గమనించిన ప్రభుత్వం పలు జిల్లాల్లో పాఠశాలలకు సెలవులు ప్రకటించడంతో పాటు పరీక్షలను వాయిదా వేసింది. వరద ప్రభావిత ప్రాంతాల్లో సహాయక చర్యల కోసం ఎస్డీఆర్ఎఫ్, హోంగార్డ్స్ బలగాలను రంగంలోకి దించి లోతట్టు గ్రామాల ప్రజలను పడవల ద్వారా సురక్షిత పునరావాస కేంద్రాలకు తరలిస్తున్నారు. రాగల 24 గంటల్లో రాష్ట్రంలో మరిన్ని భారీ వర్షాలు కురిసే అవకాశం ఉందని వాతావరణ శాఖ హెచ్చరికలు జారీ చేయడంతో నదీ తీర ప్రాంత ప్రజలు అప్రమత్తంగా ఉండాలని అధికారులు హెచ్చరించారు.
