అరోరా ఆలయంపై కాల్పుల యత్నం వేళ కుటుంబంతో అక్కడే ఉన్నాం.. తీవ్ర దిగ్భ్రాంతికి గురయ్యా: అమెరికా ఎంపీ రాజా కృష్ణమూర్తి

సూర్య అంతర్జాతీయ డెస్క్: అమెరికాలోని ఇల్లినాయిస్ రాష్ట్రం అరోరాలో ఉన్న శ్రీ వేంకటేశ్వర స్వామి హిందూ దేవాలయంపై ఒక శ్వేతజాతి దురహంకార యువకుడు సామూహిక కాల్పులకు (Mass Shooting) యత్నించిన సమయంలో తాను, తన కుటుంబ సభ్యులు అదే ఆలయంలో పూజల్లో ఉన్నామని భారత సంతతి అమెరికన్ ఎంపీ రాజా కృష్ణమూర్తి (Raja Krishnamoorthi) వెల్లడించారు. ఈ భయానక కుట్ర వివరాలు తెలిసి తీవ్ర దిగ్భ్రాంతికి గురయ్యానని ఆయన ఒక అధికారిక ప్రకటనలో పేర్కొన్నారు.

గత ఆదివారం (అక్టోబర్ 11) నవరాత్రి వేడుకల ప్రారంభం సందర్భంగా తమ కుటుంబం నిత్యం ప్రార్థనలు చేసుకునే అరోరా ఆలయానికి వెళ్లామని కృష్ణమూర్తి తెలిపారు. భారతీయ అమెరికన్లను లక్ష్యంగా చేసుకుని 19 ఏళ్ల అలెగ్జాండ్రోస్ పపోరాకిస్ అనే యువకుడు ఆటోమేటిక్ రైఫిల్‌తో కాల్పులు జరిపేందుకు సిద్ధమయ్యాడని, అయితే అదృష్టవశాత్తూ తుపాకీ జామ్ కావడంతో పెను ముప్పు తప్పిందని ఆయన గుర్తుచేసుకున్నారు. సకాలంలో స్పందించి నిందితుడిని అరెస్ట్ చేసిన పలాటిన్, మౌంట్ ప్రాస్పెక్ట్ పోలీసు విభాగాలకు, ఎఫ్‌బీఐ అధికారులకు ఆయన కృతజ్ఞతలు తెలిపారు.

అమెరికాలో భారతీయులపై ద్వేషం (Anti-Indian Hatred), శ్వేతజాతి ఆధిపత్య విష సంస్కృతి ఎంత ప్రమాదకర స్థాయికి చేరాయో ఈ ఘటన స్పష్టం చేస్తోందని రాజా కృష్ణమూర్తి ఆందోళన వ్యక్తం చేశారు. అమాయక ప్రజల ప్రాణాలు పోయేంతవరకు వేచి చూడకుండా, మైనారిటీ ప్రార్థనా స్థలాలపై సాగుతున్న విద్వేషపూరిత బెదిరింపులను అత్యంత తీవ్రంగా పరిగణించాలని ప్రభుత్వ యంత్రాంగాన్ని కోరారు. ప్రతి ఒక్కరూ ఎటువంటి భయం లేకుండా తమ మతాచారాలను పాటించే హక్కును కాపాడటానికి అందరూ ఏకతాటిపై నిలబడాలని పిలుపునిచ్చారు.