చైనా గూఢచర్య వలలో ఎన్విడియా సీఈఓ? అమెరికాలో దుమారం

సూర్య టెక్-గ్లోబల్ డెస్క్: ఆర్టిఫిషియల్ ఇంటెలిజెన్స్ (AI) రంగంలో ప్రపంచంలోనే అత్యంత విలువైన కంపెనీగా వెలుగొందుతున్న ఎన్విడియా  చీఫ్ ఎగ్జిక్యూటివ్ ఆఫీసర్ జెన్సన్ హువాంగ్  తీవ్ర వివాదంలో చిక్కుకున్నారు. చైనా నిఘా సంస్థలకు సమాచారం చేరవేస్తున్నట్లు భావిస్తున్న ఒక చైనీస్ వ్యాపారవేత్తతో ఆయన సాగించినట్లు చెబుతున్న సాన్నిహిత్యం, రహస్య మెమోలు మరియు అమెరికా ఇంటెలిజెన్స్ నిఘా వివరాలు బయటకు రావడంతో వాషింగ్టన్‌లో తీవ్ర రాజకీయ, భద్రతాపరమైన ప్రకంపనలు చెలరేగాయి. చైనా ప్రధాన గూఢచార సంస్థ మినిస్ట్రీ ఆఫ్ స్టేట్ సెక్యూరిటీ  కోసం పనిచేస్తున్న మహిళతో జెన్సన్ హువాంగ్ సంబంధాలు కలిగి ఉన్నారంటూ అమెరికా నిఘా వర్గాలు అనుమానిస్తున్నట్లు కథనాలు వెలువడటం సంచలనం సృష్టిస్తోంది.

ఎవరీ ఆలిస్ హువాంగ్? సింగపూర్ మెగాస్పీడ్ చిప్స్ వివాదం
ఈ వ్యవహారంలో ఆలిస్ హువాంగ్ (హువాంగ్ లే) అనే చైనీస్ మహిళ ప్రధాన పాత్రధారిగా ఉన్నట్లు తెలుస్తోంది. సింగపూర్‌కు చెందిన డాటా సెంటర్ కంపెనీ 'మెగాస్పీడ్' ఎండీగా ఆమె వ్యవహరించారు. అమెరికా విధించిన ఆంక్షలను దాటవేస్తూ బిలియన్ల డాలర్ల విలువైన అధునాతన ఎన్విడియా ఏఐ చిప్‌లను చైనాకు చేరవేసేందుకు మెగాస్పీడ్ సహకరిస్తోందన్న ఆరోపణలతో అమెరికా ఇంటెలిజెన్స్ చాలాకాలంగా ఆమెపై ఎలక్ట్రానిక్ నిఘా ఉంచింది. ఆగ్నేయాసియాలో భారీ డాటా సెంటర్లను నిర్మించి, వాటి క్లౌడ్ సామర్థ్యాన్ని అలీబాబా వంటి చైనా దిగ్గజ సంస్థలకు అద్దెకు ఇవ్వడం ద్వారా అమెరికా నిషేధాన్ని పరోక్షంగా అధిగమించారనేది నిఘా వర్గాల ప్రధాన పరిశీలన.

నిఘాలో బయటపడ్డ జెన్సన్ హువాంగ్ పేరు.. ట్రంప్‌కు ముందే సమాచారం?
ఆలిస్ హువాంగ్‌పై సాగించిన ఎలక్ట్రానిక్ నిఘా విశ్లేషణలో ఆమెతో సంబంధాలు కొనసాగిస్తున్న ఒక అమెరికన్ పౌరుడి వివరాలను గుర్తించే ప్రక్రియలో (అన్‌మాస్కింగ్) ఎన్విడియా అధినేత జెన్సన్ హువాంగ్ పేరు బయటపడినట్లు అంతర్జాతీయ వార్తా సంస్థలు వెల్లడించాయి. వీరిద్దరూ 2024లో తైపీలోని ఒక బార్‌లో కలిసి ఉన్న దృశ్యాలు, వ్యాపార విందుల ఫొటోలు బహిర్గతమయ్యాయి. ఈ నిఘా వివరాలు అప్పట్లోనే అధ్యక్షుడు డొనాల్డ్ ట్రంప్ దృష్టికి కూడా వెళ్లినప్పటికీ, ప్రపంచ స్టాక్ మార్కెట్లు మరియు ఎన్విడియా మార్కెట్ విలువ కుప్పకూలిపోకుండా ఉండేందుకే తక్షణ చర్యలు తీసుకోలేదని సమాచారం.

ఎన్విడియా, చైనా వర్గాల ఖండన.. కాంగ్రెస్ విచారణకు రంగం సిద్ధం
ఈ ఆరోపణలపై ఎన్విడియా యాజమాన్యం తీవ్రంగా స్పందించింది. సంస్థ ప్రతినిధి జాన్ రిజ్జో మాట్లాడుతూ.. ఒక టెక్ కంపెనీ సీఈఓగా జెన్సన్ హువాంగ్ ఏటా వేలాది మంది కస్టమర్ ఎగ్జిక్యూటివ్‌లతో సంప్రదింపులు జరుపుతుంటారని, అందులో ఎలాంటి అసాధారణత లేదా నియమ ఉల్లంఘన లేదని పేర్కొన్నారు. మెగాస్పీడ్ వంటి క్లయింట్లకు సాధారణ వ్యాపార సమాచారం మాత్రమే అందుతుందని, జాతీయ భద్రతకు లేదా వాణిజ్య రహస్యాలకు సంబంధించిన వివరాలు ఉండవని స్పష్టం చేశారు. అటు చైనా ఎంబసీ కూడా ఈ కథనాలను నిరాధారమైన అసత్య ప్రచారాలుగా కొట్టిపారేసింది. అయితే అమెరికా కాంగ్రెస్‌లోని శక్తివంతమైన ప్రతినిధుల సభ కమిటీలు ఈ వ్యవహారాన్ని తీవ్రంగా పరిగణిస్తూ, క్లోజ్డ్-డోర్ బ్రీఫింగ్ కోసం జెన్సన్ హువాంగ్‌కు పిలుపునివ్వడంతో ఈ వివాదం మరింత ముదిరే సూచనలు కనిపిస్తున్నాయి.