కోస్ట్ గార్డ్ యువకుడి అద్భుత సాహసం: పసిఫిక్‌లో 16 మందికి పునర్జన్మ!
సూర్య ఇంటర్నేషనల్ బ్యూరో, లాస్ ఏంజెల్స్: అర్ధరాత్రి కటిక చీకటి.. 8 అడుగుల ఎత్తున విరుచుకుపడుతున్న రాకాసి అలలు.. గడ్డకట్టే చలిలో మునిగిపోతున్న ప్రాణాలు. ఇలాంటి భయానక పరిస్థితుల్లో అమెరికా కోస్ట్ గార్డ్‌కు చెందిన 24 ఏళ్ల యువ రెస్క్యూ స్విమ్మర్ జోష్ లా (Josh Law) అసాధారణ ధైర్యసాహసాలను ప్రదర్శించి ఏకంగా 16 మంది ప్రాణాలను కాపాడారు. మెక్సికోలోని బాజా కాలిఫోర్నియా తీరంలో వలసదారులతో వెళ్తున్న పడవ బోల్తా పడిన ఘటనలో ఒంటరిగా సముద్రంలోకి దూకి, రెండు గంటల పాటు మృత్యువుతో పోరాడి బాధితులను సురక్షితంగా రక్షించిన వైనం అంతర్జాతీయంగా ప్రశంసలు అందుకుంటోంది.
రెండు గంటల పాటు సముద్రంలో మృత్యుంజయుడిలా పోరాటం:
మెక్సికో తీరానికి దూరంగా పసిఫిక్ మహాసముద్రంలో బోటు మునిగిపోతోందంటూ తెల్లవారుజామున 1 గంట సమయంలో అత్యవసర సమాచారం (Mayday call) అందింది. దాంతో వెంటనే కాలిఫోర్నియాలోని వెంచురా ఎయిర్ స్టేషన్ నుంచి హెలికాప్టర్ బయలుదేరింది. ఆకాశంలో చంద్రుడి వెలుతురు కూడా లేని ఆ చిమ్మచీకటిలో కేవలం నక్షత్రాలు, నైట్ విజన్ గాగుల్స్ సాయంతో పైలట్ మియాకో మిల్లర్ గాలింపు చేపట్టగా, నీటిపై కొద్దిపాటి వెలుతురు కనిపించింది. వెంటనే ఏమాత్రం ఆలోచించకుండా 24 ఏళ్ల జోష్ లా హెలికాప్టర్ నుంచి సముద్రంలోకి దూకారు. హెలికాప్టర్ బ్లేడ్ల తీవ్రమైన గాలులు, 6 నుంచి 8 అడుగుల ఎత్తున విరుచుకుపడుతున్న అలల ధాటికి ఆయన తీవ్ర అలసటకు గురైనప్పటికీ సంకల్పాన్ని వీడలేదు.
ఒక్కొక్కరినీ బట్టర్ బాస్కెట్‌లోకి చేర్చి ప్రాణదానం:
తీవ్రమైన హైపోథర్మియాతో నీటిలో చెల్లాచెదురుగా పడి కొట్టుమిట్టాడుతున్న బాధితులను జోష్ లా ఈదుకుంటూ చేరుకున్నారు. "ఆ సమయంలో నేను తీవ్ర అలసటకు గురయ్యాను, తగినంత నిద్ర కూడా లేదు. కానీ నా పరిస్థితి కంటే చావుబతుకుల మధ్య ఉన్న వారి పరిస్థితి ఎంతో ఘోరంగా ఉందన్న ఒక్క విషయమే నన్ను ముందుకు నడిపించింది" అని జోష్ లా వెల్లడించారు. ఒక చేత్తో బాధితుడిని పట్టుకుని, మరో చేత్తో హెలికాప్టర్‌కు సిగ్నల్ ఇస్తూ మెకానిక్ జారవిడిచిన రెస్క్యూ బాస్కెట్‌లోకి ఒక్కొక్కరిని ఎక్కించి మొత్తం 16 మందిని కాపాడారు. మరో 11 మంది గల్లంతైనప్పటికీ, ప్రాణాలకు తెగించి 16 మంది నిండు ప్రాణాలను నిలబెట్టిన జోష్ లా సాహసంపై అమెరికా కోస్ట్ గార్డ్ అధికారులతో పాటు ప్రపంచవ్యాప్తంగా ప్రశంసలు వెల్లువెత్తుతున్నాయి.
