అర్జెంటీనా అధ్యక్షుడు జేవియర్ మిలేయికి క్రిప్టో స్కామ్ కేసులో భారీ ఊరట
మోసం కేసును కొట్టివేసిన ఫెడరల్ జడ్జి.. నేరపూరిత ఆధారాలు లేవని స్పష్టీకరణ!
సూర్య ఇంటర్నేషనల్ డెస్క్, బ్యూనస్ ఎయిర్స్: వివాదాస్పద క్రిప్టోకరెన్సీ ప్రమోషన్ మరియు మోసం (Fraud) ఆరోపణలను ఎదుర్కొంటున్న అర్జెంటీనా అధ్యక్షుడు జేవియర్ మిలేయికి న్యాయస్థానంలో భారీ ఊరట లభించింది. క్రిప్టో మీమ్ కాయిన్ కుంభకోణానికి సంబంధించి అధ్యక్షుడు జేవియర్ మిలేయి, ఆయన సోదరి కరీనా మిలేయిలపై సాగుతున్న క్రిమినల్ దర్యాప్తును అర్జెంటీనా ఫెడరల్ కోర్టు కొట్టివేసింది. ఈ వ్యవహారంలో ఎలాంటి నేరపూరిత మోసం జరగలేదని, అభియోగాలు క్రిమినల్ నేరం కిందికి రావని స్పష్టం చేస్తూ ఫెడరల్ జడ్జి మార్సెలో మార్టినెజ్ డి జియోర్గి విచారణను పూర్తిగా ముగిస్తూ కీలక తీర్పు వెలువరించారు.
$LIBRA మీమ్ కాయిన్ వివాదం – ఇన్వెస్టర్ల నష్టాలు:
సోషల్ మీడియా ప్లాట్‌ఫామ్ 'ఎక్స్' (X) వేదికగా అధ్యక్షుడు జేవియర్ మిలేయి గతంలో '$LIBRA' అనే క్రిప్టోకరెన్సీని ప్రస్తావిస్తూ పోస్ట్ చేశారు. అధ్యక్షుడి పోస్ట్‌తో ఆ కాయిన్ విలువ క్షణాల్లో భారీగా పెరిగినప్పటికీ, కొన్ని గంటల్లోనే తీవ్రంగా పతనమైంది. దీనివల్ల ప్రపంచవ్యాప్తంగా ఇన్వెస్టర్లు సుమారు 200 మిలియన్ డాలర్లకు పైగా నష్టపోయారు. డెవలపర్లు నిధులతో పరారయ్యే 'రగ్ పుల్' (Rug Pull) తరహా మోసానికి అధ్యక్షుడి ప్రోత్సాహం కారణమంటూ విపక్షాలు తీవ్రస్థాయిలో విరుచుకుపడ్డాయి. అయితే ఆ ప్రాజెక్టు పూర్తి వివరాలు తనకు తెలియకపోవడంతోనే పోస్ట్‌ను వెంటనే తొలగించానని, సద్భావనతోనే వ్యవహరించానని మిలేయి వివరణ ఇచ్చారు.
నేరం రుజువు కాలేదన్న న్యాయస్థానం:
ఈ కేసుకు సంబంధించి ప్రాసిక్యూటర్ ఎడ్వర్డో తైయానో సమర్పించిన నివేదిక ఆధారంగా జడ్జి మార్టినెజ్ డి జియోర్గి తుది ఆదేశాలు జారీ చేశారు. వర్చువల్ కరెన్సీ ధరల ఒడిదుడుకులు లేదా ఇన్వెస్టర్ల నష్టాలు మాత్రమే మోసాన్ని రుజువు చేసేందుకు సరిపోవని న్యాయమూర్తి పేర్కొన్నారు. అలాగే అధ్యక్షుడి సోదరి, సెక్రటరీ జనరల్ కరీనా మిలేయి క్రిప్టో వ్యాపారులతో భేటీలు ఏర్పాటు చేసినందుకు ఎలాంటి ఆర్థిక లబ్ధి పొందలేదని, కేవలం సమావేశం ఏర్పాటు చేయడమే అధికార దుర్వినియోగం కాబోదని తీర్పులో స్పష్టం చేశారు. మిలేయితో పాటు దర్యాప్తు ఎదుర్కొంటున్న మరో తొమ్మిది మందికి కూడా ఈ కేసులో విముక్తి లభించడంతో అర్జెంటీనా అధికార పక్షానికి రాజకీయంగా పెద్ద ఊరట లభించినట్లయింది.
