తైజ్‌పై హౌతీల ముట్టడి: యెమెన్‌లో మానవతా సంక్షోభం
సూర్య ఇంటర్నేషనల్ డెస్క్: అంతర్యుద్ధంతో అట్టుడుకుతున్న యెమెన్‌లో మరోసారి పెను మానవతా సంక్షోభం తలెత్తింది. దేశంలో మూడో అతిపెద్ద నగరమైన తైజ్ (Taiz) నగరాన్ని హౌతీ తిరుగుబాటుదారులు నెల రోజులుగా పూర్తి దిగ్బంధంలో ఉంచడంతో స్థానిక ప్రజల జీవనం నరకప్రాయంగా మారింది. నగరానికి బయటి ప్రాంతాల నుంచి నిత్యావసరాలు, ఇంధనం మరియు తాగునీటి సరఫరాను హౌతీలు పూర్తిగా నిలిపివేయడంతో లక్షలాది మంది ప్రజలు ఆకలితో అలమటిస్తున్నారు.
నగరానికి అనుసంధానంగా ఉన్న ఏకైక రవాణా మార్గమైన అడెన్ రహదారిని మూసివేయడంతో పాటు చివరి నీటి వనరులను కూడా ఆధీనంలోకి తీసుకోవడంతో పరిస్థితి మరింత దిగజారింది. దీంతో నగరంలో గోధుమలు, నిత్యావసర సరుకుల నిల్వలు దాదాపు నిండుకున్నాయి. స్థానిక మార్కెట్లలో ఆహార పదార్థాలు, ఇంధనం ధరలు రెట్టింపు కావడంతో పాటు స్వచ్ఛమైన తాగునీరు లభించక ప్రజలు తీవ్ర ఇబ్బందులు పడుతున్నారు.
క్షేత్రస్థాయిలో నెలకొన్న తీవ్ర పరిస్థితులు:
ఆస్పత్రులపై తీవ్ర ప్రభావం
ఇంధన కొరత కారణంగా దాదాపు 120కి పైగా ప్రాథమిక ఆరోగ్య కేంద్రాలు మూతపడ్డాయి. డయాలసిస్ సేవలు, నవజాత శిశువుల ఐసీయూ విభాగాలు అత్యవసర ఆక్సిజన్, జనరేటర్ ఇంధనం లేక మూసివేత అంచున నిలిచాయి. సుమారు 1,800 మందికి పైగా రోగులు ప్రాణావసర డయాలసిస్ మందుల కోసం ఎదురుచూస్తున్నారు.
ఆహార భద్రత సంక్షోభం
ఐక్యరాజ్యసమితికి చెందిన వరల్డ్ ఫుడ్ ప్రోగ్రామ్ ప్రకారం, నగరంలోని 6 లక్షల మందికి పైగా బాధితులకు తక్షణ ఆహార సహాయం అందించలేకపోతున్నారు. వీరిలో 2 లక్షల మందికి పైగా మహిళలు, చిన్నారులే ఉండటం గమనార్హం.
పౌరులను కవచాలుగా మలుస్తున్న వైనం
నగరంలో చిక్కుకుపోయిన సుమారు 8 లక్షల మంది పౌరులను బందీలుగా మార్చుతూ, ఆకలిని యుద్ధ అస్త్రంగా మార్చడం అంతర్జాతీయ చట్టాల ఉల్లంఘన అని మానవ హక్కుల సంఘాలు, యూరోపియన్ యూనియన్ ఆందోళన వ్యక్తం చేశాయి.
తైజ్ నగర ప్రజలను రాతి యుగం నాటి స్థితికి నెట్టివేస్తున్నారని స్థానిక యంత్రాంగం ఆవేదన వ్యక్తం చేసింది. నగరానికి తక్షణమే మానవతా సాయం, ఆహారం, మందులు చేరేందుకు సేఫ్ కారిడార్‌ను తెరవాలని ఐరాస మరియు అంతర్జాతీయ సమాజం హౌతీ బలగాలను డిమాండ్ చేస్తున్నాయి.
