సివిల్ రైట్స్ చీఫ్ పదవికి హర్మీత్ ధిల్లాన్ రాజీనామా

సూర్య ఇంటర్నేషనల్ డెస్క్, వాషింగ్టన్: అమెరికా న్యాయశాఖ  సివిల్ రైట్స్ డివిజన్ అసిస్టెంట్ అటార్నీ జనరల్‌గా వ్యవహరిస్తున్న భారతీయ అమెరికన్ ప్రముఖురాలు హర్మీత్ కౌర్ ధిల్లాన్  తన పదవికి రాజీనామా చేశారు. ఇటీవల జరిగిన మధ్యంతర ఎన్నికల్లో రిపబ్లికన్ పార్టీ ఎదుర్కొన్న పరాజయాల నేపథ్యంలో ఆమె తన పదవి నుంచి తప్పుకోవడం అమెరికా రాజకీయ వర్గాల్లో ప్రాధాన్యత సంతరించుకుంది. ట్రంప్ యంత్రాంగంలో సివిల్ రైట్స్ చీఫ్‌గా సుమారు 18 నెలల పాటు సేవలు అందించిన ఆమె, తన పదవీకాలం ముగింపును ప్రకటించడంతో పాటు ఈ బాధ్యతలను నిర్వర్తించడం తన జీవితంలోనే అత్యంత గొప్ప గౌరవంగా అభివర్ణించారు.

డీఐఈ విధానాల రద్దు, మహిళా క్రీడా రక్షణే లక్ష్యంగా సేవలూ
రాజీనామా అనంతరం సోషల్ మీడియా వేదికగా హర్మీత్ ధిల్లాన్ స్పందిస్తూ.. ట్రంప్ ప్రభుత్వంలో సివిల్ రైట్స్ విభాగానికి నేతృత్వం వహించడం గర్వకారణమని పేర్కొన్నారు. తన పదవీకాలంలో చట్టవిరుద్ధమైన డైవర్సిటీ, ఈక్విటీ అండ్ ఇన్‌క్లూజన్ విధానాల అంతానికి కృషి చేశామని, మహిళలు మరియు బాలికల క్రీడా హక్కులను పరిరక్షించేందుకు బలంగా పోరాడామని తెలిపారు. తనకు ఈ అవకాశం కల్పించిన అమెరికా అధ్యక్షుడు డొనాల్డ్ ట్రంప్‌నకు ధన్యవాదాలు తెలిపారు. వ్యక్తిగత కారణాలరీత్యా తిరిగి ప్రైవేట్ లీగల్ ప్రాక్టీస్‌లోకి వెళ్లాలని నిర్ణయించుకున్నట్లు ఆమె స్పష్టం చేశారు.

అటార్నీ జనరల్ ప్రశంసలు
హర్మీత్ ధిల్లాన్ రాజీనామాను అటార్నీ జనరల్ టాడ్ బ్లంఛ్ ఆమోదించారు. గత 18 నెలలుగా సివిల్ రైట్స్ డివిజన్‌ను ఆమె ఎంతో నిబద్ధతతో నడిపారని, ప్రతి అమెరికన్ పౌరుడి పౌర హక్కులను కాపాడటంలో ఎలాంటి భయాలు, పక్షపాతాలు లేకుండా చట్టాన్ని అమలు చేశారని ప్రశంసించారు. మధ్యంతర ఎన్నికల ఫలితాల తర్వాత ట్రంప్ పరిపాలనలో సీనియర్ స్థాయి నుంచి వెలువడిన తొలి రాజీనామా ఇదే కావడం గమనార్హం. రాబోయే కాలంలో మరికొందరు రాజకీయ నియామకాలు పొందిన అధికారులు కూడా తమ పదవులపై పునఃసమీక్షించుకునే అవకాశముందని నిపుణులు అంచనా వేస్తున్నారు.