గల్ఫ్ దేశాలతో ఇరాన్ విదేశాంగ మంత్రి అత్యవసర చర్చలు

సూర్య ఇంటర్నేషనల్ డెస్క్, టెహ్రాన్: మధ్యప్రాచ్యంలో మరోసారి తీవ్ర ఉద్రిక్తతలు చెలరేగుతున్న వేళ, ఇరాన్ దౌత్యపరమైన ముందస్తు చర్యలను వేగవంతం చేసింది. అమెరికా సైనిక బలగాలు తమ దేశంపై ఎప్పుడైనా పెద్ద ఎత్తున వైమానిక దాడులకు దిగే అవకాశముందన్న నిఘా నివేదికలు, భయాందోళనల నేపథ్యంలో ఇరాన్ విదేశాంగ మంత్రి అబ్బాస్ అరాఘ్చీ గల్ఫ్ దేశాల విదేశాంగ మంత్రులతో వరుసగా ఫోన్ చర్చలు జరిపారు. ఒమన్, ఖతార్, సౌదీ అరేబియాతో పాటు టర్కీ, కువైట్, జోర్డాన్ దేశాల ప్రతినిధులతో ఆయన అత్యవసరంగా సంప్రదింపులు జరిపి ప్రస్తుత ప్రాంతీయ పరిస్థితులు, ఉద్రిక్తతల నివారణకు తీసుకోవాల్సిన చర్యలపై విస్తృతంగా చర్చించారు.

అమెరికా రక్షణ శాఖ అధికారులు, కమాండర్ల ప్రణాళికల ప్రకారం ఇరాన్‌లోని ఇంధన మౌలిక వసతులు, అణు కేంద్రాలు మరియు క్షిపణి స్థావరాలపై దాడులు చేసేందుకు రంగం సిద్ధమైందన్న అంతర్జాతీయ మీడియా కథనాలు ఈ ఆందోళనలకు ప్రధాన కారణమయ్యాయి. ఈ నేపథ్యంలో చర్చలు జరిపిన అరాఘ్చీ.. ఇరాన్ శాంతిని కాంక్షిస్తోందని, ప్రాంతీయ స్థిరత్వం కోసం మరియు సంక్షోభ నివారణకు జరిగే ఎలాంటి దౌత్య ప్రయత్నాలకైనా సిద్ధంగా ఉందని స్పష్టం చేశారు. అయితే తమ సార్వభౌమాధికారంపై దాడి జరిగితే తీవ్రమైన ప్రతిస్పందన తప్పదని ఇరాన్ వర్గాలు హెచ్చరిస్తుండగా, గల్ఫ్ దేశాలు సంయమనం పాటించాలని, ప్రత్యక్ష ఘర్షణను నివారించేందుకు తక్షణమే చర్చల మార్గాన్ని ఎంచుకోవాలని కోరాయి.