బెంగళూరు ఎయిర్‌పోర్ట్ రోడ్డులో 18 నెలలు ట్రాఫిక్ ఆంక్షలు

సూర్య ప్రతినిధి, బెంగళూరు: కెంపెగౌడ అంతర్జాతీయ విమానాశ్రయం (KIA) వైపు నిత్యం రాకపోకలు సాగించే విమాన ప్రయాణికులు, నగర వాసులకు రాబోయే రోజుల్లో ప్రయాణ సమయం మరింత పెరగనుంది. బళ్లారి రోడ్డు మీదుగా మేఖ్రి సర్కిల్ సమీపంలో బెంగళూరు డెవలప్‌మెంట్ అథారిటీ (బీడీఏ) దాదాపు ₹420 కోట్ల వ్యయంతో నాలుగు లేన్ల ఎలివేటెడ్ కారిడార్ నిర్మాణ పనులను ప్రారంభించింది. ఈ భారీ ప్రాజెక్టు నిర్మాణం దాదాపు 18 నెలల పాటు కొనసాగనుండటంతో బెంగళూరు ట్రాఫిక్ పోలీసులు కీలకమైన హెబ్బాల్, బళ్లారి రోడ్డు కారిడార్‌లో విస్తృత ట్రాఫిక్ మళ్లింపులు (Diversions), ప్రయాణ ఆంక్షలను అమల్లోకి తెచ్చారు.

భారీ వాహనాలు, బస్సులపై ఆంక్షలు
నిర్మాణ పనుల కారణంగా ట్రాఫిక్ రద్దీని నివారించేందుకు బళ్లారి ప్రధాన రహదారిపై గూడ్స్ వాహనాలు, ప్రైవేట్ మరియు కేఎస్సార్టీసీ భారీ బస్సుల రాకపోకలను నిషేధించారు. అయితే పాఠశాల బస్సులు, కార్లు, ద్విచక్ర వాహనాలు యథావిధిగా బళ్లారి రోడ్డులో ప్రయాణించేందుకు అనుమతి ఇచ్చారు. ప్రధాన రహదారిపై ఒక వైపు లేన్లలో పనులు జరుగుతుండటంతో సర్వీస్ రోడ్లు, ఔటర్ రింగ్ రోడ్డు మార్గాల ద్వారా ఇతర ప్రయాణికులను దారి మళ్లిస్తున్నారు.

ప్రధాన ట్రాఫిక్ డైవర్షన్లు ఇలా
హెబ్బాల్ ఫ్లైఓవర్ నుంచి బెంగళూరు సిటీ వైపు వచ్చే వాహనదారులు బాప్టిస్ట్ ఆసుపత్రి ఎదురుగా ఉన్న సర్వీస్ రోడ్డులోకి ప్రవేశించి సీబీఐ జంక్షన్ వరకు కొనసాగి ప్రధాన రహదారిలోకి చేరుకోవాల్సి ఉంటుంది. ఆనంద్‌నగర్, ఆర్టీ నగర్ వైపు వెళ్లేవారు బాప్టిస్ట్ హాస్పిటల్ సర్వీస్ రోడ్డు గుండా ఆనంద్‌నగర్ క్రాస్ వరకు వెళ్లి, సీబీఐ జంక్షన్ వద్ద ఎడమ మలుపు తీసుకుని జయమహల్ రోడ్డు మీదుగా ప్రయాణించవచ్చు. యశ్వంతపూర్ నుంచి ఎయిర్‌పోర్టు వైపు వెళ్లే వాహనాలు మత్తికెరె రోడ్డు, బీఈఎల్ సర్కిల్ వద్ద కుడి మలుపు తీసుకుని రింగ్ రోడ్డు మీదుగా కెంపెగౌడ ఎయిర్‌పోర్టుకు చేరుకోవాలని సూచించారు. అదేవిధంగా యశ్వంతపూర్ నుంచి సెంట్రల్ బెంగళూరు వైపు వచ్చే వారు బీహెచ్ఈఎల్ జంక్షన్, మారంమ సర్కిల్, మల్లేశ్వరం మార్గోసా రోడ్డు మార్గాన్ని ఎంచుకోవచ్చు.

ప్రయాణికులు అదనపు సమయం కేటాయించాలి
హెబ్బాల్ జంక్షన్ వద్ద ఇప్పటికే సాధారణ సమయాల్లోనూ తీవ్ర రద్దీ నెలకొంటున్న నేపథ్యంలో, తాజా ఆంక్షలు ఉదయం మరియు సాయంత్రం పీక్ అవర్స్‌లో ప్రయాణ సమయాన్ని భారీగా పెంచే అవకాశముంది. ఈ క్రమంలో ఫ్లైట్ అందుకోవాల్సిన విమాన ప్రయాణికులు సాధారణ సమయం కంటే కనీసం గంట నుంచి గంటన్నర ముందే ప్రయాణాన్ని ప్రారంభించి ప్రత్యామ్నాయ మార్గాలను ఉపయోగించాలని ట్రాఫిక్ విభాగం విజ్ఞప్తి చేసింది. నిర్మాణ పనులు సజావుగా సాగేందుకు వాహనదారులు నిర్దేశిత మార్గదర్శకాలను పాటించి పోలీసులకు సహకరించాలని కోరారు.