డెన్వర్ ఎయిర్పోర్టులో అమెరికన్ ఎయిర్లైన్స్ విమానానికి తప్పిన పెనుప్రమాదం
సూర్య అంతర్జాతీయ డెస్క్: అమెరికాలోని డెన్వర్ అంతర్జాతీయ విమానాశ్రయంలో అమెరికన్ ఎయిర్లైన్స్ విమానానికి పెనుప్రమాదం తప్పింది. విమానం టేకాఫ్ అవుతున్న సమయంలో ఒక్కసారిగా టైర్ పేలిపోవడంతో పాటు బ్రేకులకు మంటలు అంటుకున్నాయి. ఈ ఊహించని పరిణామాతో విమానాశ్రయ సిబ్బంది మరియు ప్రయాణికులు ఒక్కసారిగా తీవ్ర భయాందోళనకు గురయ్యారు.
అప్రమత్తమైన పైలట్ వెంటనే అప్రమత్తమై విమానాన్ని నిలిపివేయగా, సిబ్బంది అత్యవసర తరుణంలో తక్షణ చర్యలు చేపట్టారు. విమానంలోని ఎమర్జెన్సీ స్లైడ్స్ను తెరిచి ప్రయాణికులను సురక్షితంగా బయటకు తరలించారు. ఈ ప్రమాద సమయంలో విమానంలో ఉన్న మొత్తం 173 మంది ప్రయాణికులు ఎమర్జెన్సీ స్లైడ్స్ ద్వారా ఎలాంటి ప్రాణనష్టం జరగకుండా సురక్షితంగా బయటపడ్డారు.
ఈ హఠాత్పరిణామంలో పలువురు ప్రయాణికులకు స్వల్ప గాయాలైనట్లు సమాచారం. సమాచారం అందుకున్న వెంటనే అగ్నిమాపక మరియు రక్షణ బృందాలు సంఘటనా స్థలానికి చేరుకుని బ్రేకులకు అంటుకున్న మంటలను పూర్తిగా అదుపులోకి తెచ్చాయి. ఈ ఘటనకు సంబంధించిన పూర్తి వివరాలపై విమానాశ్రయ అధికారులు మరియు విమానయాన భద్రతా నిపుణులు దర్యాప్తు జరుపుతున్నారు.
