భారత్ సంస్కృతి, ఆతిథ్యం అద్భుతం.. సోషల్ మీడియాలో దుష్ప్రచారాన్ని తప్పుపట్టిన బ్రిటీష్ యాత్రికుడు రిచర్డ్ లా రుయినా!

సూర్య అంతర్జాతీయ & టూరిజం డెస్క్: భారతదేశ ఘనమైన సాంస్కృతిక వైవిధ్యం, చారిత్రక సంపద, నిర్మాణ కౌశలం మరియు విశిష్టమైన ఆతిథ్యాన్ని ప్రశంసిస్తూ బ్రిటన్‌కు చెందిన ప్రముఖ యాత్రికుడు రిచర్డ్ లా రుయినా (Richard La Ruina) చేసిన పోస్ట్ సామాజిక మాధ్యమాల్లో విశేష ఆదరణ పొందుతోంది. అదే సమయంలో విదేశీ సోషల్ మీడియా, యూట్యూబ్ వేదికల్లో భారత్‌ను కేవలం మురికివాడలు, అపరిశుభ్ర వీధి ఆహారంతో ముడిపెడుతూ కావాలని చేస్తున్న వ్యతిరేక, జాత్యహంకార ప్రచారాన్ని ఆయన తీవ్రస్థాయిలో తప్పుపట్టారు.

భారత్‌లో తన రెండో పర్యటన అనుభవాలను పంచుకున్న రిచర్డ్.. ఇక్కడి ప్రజలు చూపించే ఆదరణ, 'అతిథి దేవో భవ' సంస్కృతి, ప్రపంచంలోనే అత్యుత్తమ సేవా దృక్పథం తనను ఎంతగానో ఆకట్టుకున్నాయని పేర్కొన్నారు. దేశంలోని విమానాశ్రయాలు, రహదారుల మౌలిక వసతులు, పచ్చదనం ఎంతో బాగున్నాయని కొనియాడారు. భారత్‌కు మొదటిసారి వచ్చే విదేశీ పర్యాటకులకు జైపూర్, ఉదయ్‌పూర్ నగరాలను ఆయన ప్రత్యేకంగా సిఫార్సు చేశారు.

కేవలం వ్యూస్ కోసమే కొందరు భారత్ గురించి తప్పుడు కథనాలను ప్రచారం చేస్తున్నారని ఆయన స్పష్టం చేశారు. దేశ విశిష్టతను, నిజమైన అందాలను ప్రతిబింబించేలా ఆయన వెల్లడించిన అభిప్రాయాలను నెటిజన్లు పెద్ద ఎత్తున స్వాగతిస్తూ అభినందనలు తెలుపుతున్నారు.