అరుణాచల్ ప్రదేశ్‌లో పవిత్ర బుద్ధ అవశేషాలకు నీరాజనం బ్రహ్మాండమైన స్పందన
సూర్య ఆధ్యాత్మిక డెస్క్: అరుణాచల్ ప్రదేశ్‌లో జరుగుతున్న భగవాన్ శ్రీ బుద్ధుని పవిత్ర అవశేషాల ప్రదర్శనకు భక్తుల నుంచి అపూర్వమైన స్పందన లభిస్తోంది. రాష్ట్రంలోని వివిధ ప్రాంతాలలో కొనసాగుతున్న ఈ ఆధ్యాత్మిక వేడుకలో ఇప్పటివరకు సుమారు యాభై వేల మందికి పైగా భక్తులు ప్రత్యక్షంగా పాల్గొని పవిత్ర అవశేషాలను దర్శించుకున్నారు. కేంద్ర సంస్కృతి మంత్రిత్వ శాఖ, నేషనల్ మ్యూజియం, అరుణాచల్ ప్రదేశ్ ప్రభుత్వం మరియు ఇంటర్నేషనల్ బుద్ధిస్ట్ కాన్ఫెడరేషన్ సంయుక్త ఆధ్వర్యంలో ఈ చారిత్రక ప్రదర్శన అత్యంత వైభవంగా నిర్వహించబడుతోంది.
ఈ విశేష ప్రదర్శన గడెన్ నమ్గ్యాల్ లత్సే ఆరామమంలో అత్యంత ఘనంగా ప్రారంభమైంది. తవాంగ్ ప్రాంతంలో జరిగిన మొదటి విడత కార్యక్రమంలో ముప్పై వేలకు పైగా భక్తులు మరియు స్థానిక ప్రజలు భారీ సంఖ్యలో తరలివచ్చి ప్రత్యేక ప్రార్థనలు నిర్వహించారు. సరిహద్దు ప్రాంతాల నుంచి కూడా బౌద్ధ భిక్షువులు, ఆధ్యాత్మికవేత్తలు పెద్ద ఎత్తున విచ్చేసి పవిత్ర అవశేషాలషో తమ భక్తిభావాన్ని చాటుకున్నారు.
తవాంగ్ ప్రదర్శన ముగిసిన అనంతరం ఈ పవిత్ర అవశేషాలను బొమ్దిలాలోని తబ్చోగ్ గాట్సెల్ లింగ్ ఆరామమంనకు తరలించడం జరిగింది. అక్కడ జరుగుతున్న ప్రజా ప్రదర్శనలోనూ స్థానికులతో పాటు చుట్టుపక్కల ప్రాంతాల నుంచి భక్తులు భారీ సంఖ్యలో బారులు తీరి పవిత్ర దర్శనం చేసుకుంటున్నారు. ఈశాన్య రాష్ట్రాలలో బౌద్ధ సంప్రదాయాలు, ఆధ్యాత్మిక వాతావరణం మరియు సాంస్కృతిక వారసత్వ గొప్పతనాన్ని ఈ వేడుక మరింత ఇనుమడింపజేస్తోందని నిర్వాహకులు వెల్లడించారు.
బొమ్దిలాలో కొనసాగుతున్న షెడ్యూల్ ముగిసిన తర్వాత ఈ పవిత్ర అవశేషాలను నామ్సాయిలోని ప్రసిద్ధ గోల్డెన్ పగోడాకు తీసుకువెళ్లనున్నారు. అక్కడ నవంబర్ పద్నాలుగు నుంచి ఇరవై వరకు భక్తుల సందర్శనార్థం ప్రత్యేక ఏర్పాట్లు చేయబడ్డాయి. భారతదేశపు ప్రాచీన బౌద్ధ సంపదను కాపాడటంతో పాటు, దేశ విదేశాలలోని బౌద్ధ అనుయాయులతో సాంస్కృతిక సంబంధాలను బలోపేతం చేసే దిశగా కేంద్ర ప్రభుత్వం ఈ తరహా చారిత్రక కార్యక్రమాలను చేపడుతోంది.
