పెళ్లి వార్తలపై క్లారిటీ వచ్చేసింది.. ఈషా రెబ్బా నా కొడుకు లైఫ్ పార్ట్నర్ అన్నంత పనిచేసిన తరుణ్ మదర్!
సూర్య ఎంటర్టైన్మెంట్ డెస్క్: పెళ్లిచూపులు, ఈ నగరానికి ఏమైంది వంటి వైవిధ్యమైన చిత్రాలతో తెలుగు ప్రేక్షకులలో ప్రత్యేక గుర్తింపు సంపాదించుకున్న దర్శకుడు, నటుడు తరుణ్ భాస్కర్ వ్యక్తిగత జీవితంపై గత కొంతకాలంగా సాగుతున్న ఊహాగానాలకు ఎట్టకేలకు తెరపడింది. ఆయన దర్శకత్వం వహించిన సూపర్ హిట్ మూవీ ఈ నగరానికి ఏమైంది సీక్వెల్ నవంబర్ 20న థియేటర్లలో గ్రాండ్గా విడుదల కానున్న నేపథ్యంలో చిత్ర బృందం తాజాగా ప్రీ రిలీజ్ ఈవెంట్ను నిర్వహించింది. ఈ వేడుకకు హాజరైన తరుణ్ భాస్కర్ తల్లి గీతా భాస్కర్ వేదికపై మాట్లాడుతూ, టాలీవుడ్ నటి ఈషా రెబ్బాతో తన కుమారుడికి ఉన్న అనుబంధాన్ని అధికారికంగా ధృవీకరించి అందరినీ ఆశ్చర్యపరిచారు.
గత రెండేళ్ల కాలంలో తరుణ్ భాస్కర్ తన జీవితంలో ఎన్నో ఒడుదొడుకులను, సవాళ్లను ఎదుర్కొన్నాడని గీతా భాస్కర్ భావోద్వేగంతో గుర్తు చేసుకున్నారు. కోర్టు కేసులు, కొత్త ఇంటి నిర్మాణం వంటి వ్యక్తిగత సమస్యలతో పాటు సినిమా పనుల ఒత్తిడి వల్ల అసలు ఇంటికే రాని రోజులు కూడా చాలా ఉన్నాయని ఆమె తెలిపారు. అలాంటి క్లిష్ట పరిస్థితుల్లో అర్ధరాత్రి రెండు గంటలకు, తెల్లవారుజామున నాలుగు గంటలకు ఇంటికి తిరిగి వచ్చినప్పుడు కూడా ఓపికగా భోజనం పెడుతూ అండగా నిలబడే ఒక మంచి తోడు తరుణ్కు దొరికిందని ఆమె సంతోషం వ్యక్తం చేశారు. తనకు వయసు పెరుగుతున్న కొద్దీ తరుణ్ భవిష్యత్తు గురించి ఆందోళన ఉండేదని, కానీ ఇప్పుడు ఆ భయం పూర్తిగా తొలగిపోయిందని ఆమె పేర్కొన్నారు.
అందరూ ఎప్పటినుంచో అనుకుంటున్నట్లుగానే ఆ వ్యక్తి మరెవరో కాదని, టాలెంటెడ్ హీరోయిన్ ఈషా రెబ్బానే అని గీతా భాస్కర్ బహిరంగంగా వెల్లడించారు. ఈషా తన కుమారుడికి కేవలం ఒక మంచి స్నేహితురాలు మాత్రమే కాదని, ఒక అద్భుతమైన సోల్మేట్ అని ఆమె అభివర్ణించారు. ఈషా అందించిన నిరంతర ప్రోత్సాహం, మానసిక అండదండల వల్లే తరుణ్ ఈ సినిమాను విజయవంతంగా పూర్తి చేయగలిగాడని, ఆమె రూపంలో తన కొడుకుకు జీవితాంతం తోడుండే మంచి వ్యక్తి లభించిందని గీతా భాస్కర్ ఆనందం వ్యక్తం చేశారు.
తరుణ్ భాస్కర్ తల్లి స్వయంగా పబ్లిక్ వేదికపై ఈషా రెబ్బా పేరును ప్రస్తావిస్తూ సోల్మేట్గా ప్రకటించడం ఇప్పుడు టాలీవుడ్ సర్కిల్స్లో హాట్ టాపిక్గా మారింది. గత కొంతకాలంగా వీరిద్దరూ కలిసి పలు వేడుకలలో, పండుగలలో కనిపించడం, రిలేషన్షిప్లో ఉన్నారంటూ సోషల్ మీడియాలో వార్తలు రావడం తెలిసిందే. ఇప్పుడు నేరుగా కుటుంబ సభ్యుల నుంచే స్పష్టమైన ప్రకటన రావడంతో, ఈ జంట త్వరలోనే పెళ్లిపీటలు ఎక్కబోతున్నారంటూ అభిమానులు మరియు సినీ వర్గాలు ఆసక్తిగా చర్చించుకుంటున్నాయి.
Also Read: ఏడాది కనిష్టానికి పడిపోయిన బంగారం ధరలు