ఓటీటీకి వచ్చేసిన విభిన్న ప్రేమకథా చిత్రం 'కికు చిరంజీవి': స్ట్రీమింగ్ ఎక్కడంటే?
సూర్య ఎంటర్‌టైన్‌మెంట్ డెస్క్: తెలుగు తెరపై ప్రయోగాత్మక కథాంశాలతో రూపొందిన చిత్రాలకు ప్రేక్షకుల నుంచి ఎప్పుడూ ప్రత్యేకమైన ఆధరణ లభిస్తుంది. ఆ కోవకే చెందిన విభిన్నమైన లవ్ అండ్ ఎమోషనల్ డ్రామా 'కికు చిరంజీవి' సినిమా ఇప్పుడు డిజిటల్ ప్రేక్షకులను అలరించేందుకు సిద్ధమైంది. థియేటర్లలో వైవిధ్యమైన అనుభూతిని పంచిన ఈ చిత్రం, త్వరలోనే ప్రముఖ తెలుగు ఓటీటీ వేదికపై స్ట్రీమింగ్ కానుందంటూ మేకర్స్ అధికారిక ప్రకటన విడుదల చేశారు. దీంతో సినిమా చూడని ప్రేక్షకులు, ఓటీటీ ప్రియులు ఈ డిజిటల్ ప్రీమియర్ కోసం ఎంతగానో ఎదురుచూస్తున్నారు.
శుభసాయి వెంకట్ దర్శకత్వంలో తెరకెక్కిన ఈ చిత్రంలో కికు యనమల హీరోగా నటించగా, కాశిష్ ఖాన్ హీరోయిన్‌గా మెప్పించారు. వీరితో పాటు ఈశ్వరీ రావు, తనికెళ్ల భరణి, గోపరాజు రమణ, శ్రీకాంత్ అయ్యంగార్ వంటి ప్రముఖ తారాగణం కీలక పాత్రల్లో నటించి సినిమాను మరింత బలోపేతం చేశారు. అరుదైన గుండె సంబంధిత వైద్య సమస్యతో బాధపడుతున్న ఓ యువ ఫోటోగ్రాఫర్ జీవితం, వివాహంపై విభిన్నమైన అభిప్రాయాలున్న ఓ యువతి కలయిక చుట్టూ ఈ కథ నడుస్తుంది. సమాజంలో సాధారణంగా కనిపించని సరికొత్త కోణాన్ని స్పృశిస్తూ ఈ సినిమాను తెరకెక్కించిన తీరు ప్రేక్షకులను ఆకట్టుకుంది.
ఈ సినిమా డిజిటల్ స్ట్రీమింగ్ హక్కులను ప్రముఖ తెలుగు ఓటీటీ ప్లాట్‌ఫారమ్ 'ఆహా' దక్కించుకుంది. నవంబర్ 14 నుంచి ఈ చిత్రం ఆహా వేదికగా అధికారికంగా స్ట్రీమింగ్ కానుంది. థియేట్రికల్ రన్ ముగిసిన తర్వాత ఓటీటీలోకి వస్తున్న ఈ సినిమా కుటుంబ సమేతంగా చూడదగ్గ భావోద్వేగాలతో కూడుకుని ఉంటుందని ట్రేడ్ వర్గాలు చెబుతున్నాయి. శేఖర్ చంద్ర అందించిన సంగీతం, సున్నితమైన భావోద్వేగాలు ఈ చిత్రానికి ప్రధాన ఆకర్షణగా నిలవడంతో, డిజిటల్ రంగంలోనూ ఈ సినిమా అద్భుతమైన వ్యూస్‌ను సొంతం చేసుకుంటుందని అంచనా వేస్తున్నారు
