కమల్ హాసన్: భారతీయ సినిమా ప్రయోగశాల.. ఒక నటుడిగా ఆయన ప్రయాణం!

సూర్య ఎంటర్‌టైన్‌మెంట్ డెస్క్: భారతీయ సినిమా చరిత్రలో తనకంటూ ఒక ప్రత్యేక అధ్యాయాన్ని లిఖించుకున్న దిగ్గజ నటుడు కమల్‌ హాసన్‌ నేడు తన పుట్టినరోజును ఘనంగా జరుపుకుంటున్నారు. బాలనటుడిగా సినీరంగ ప్రవేశం చేసిన ఆయన, దశాబ్దాలు గడిచినా ఏమాత్రం జోరు తగ్గించకుండా ప్రయోగాలు, కొత్తదనం, సృజనాత్మకతతో తన ప్రయాణాన్ని కొనసాగిస్తూనే ఉన్నారు. తెరపై కనిపించే ఒక సాధారణ నటుడిగా మాత్రమే కాకుండా, సినిమా నిర్మాణంలోని ప్రతి విభాగంలోనూ తనదైన ముద్ర వేసిన అరుదైన కళాకారుడిగా ఆయన దేశవ్యాప్తంగా గుర్తింపు తెచ్చుకున్నారు. ఈ ప్రత్యేకమైన రోజు సందర్భంగా ఆయన కుమార్తె అక్షరా హాసన్‌ సోషల్ మీడియా వేదికగా ప్రత్యేకంగా శుభాకాంక్షలు తెలుపుతూ తండ్రితో ఉన్న అనుబంధాన్ని పంచుకున్నారు.

కమల్‌ హాసన్‌ సినీ కెరీర్‌లో ప్రయోగాత్మక చిత్రాలకు కొదవలేదు. ముఖ్యంగా 2008లో వచ్చిన దశావతారం చిత్రంలో ఆయన ఏకంగా పది విభిన్న పాత్రల్లో నటించి ప్రపంచవ్యాప్తంగా ఉన్న సినీ ప్రేక్షకులను విస్మయానికి గురిచేశారు. ఒక్కో పాత్రకు భిన్నమైన రూపం, శరీరాకృతి, హావభావాలు తీసుకొచ్చి ఒక నటుడిగా తన అంకితభావాన్ని నిరూపించుకున్నారు. కేవలం నటనతోనే కాకుండా సాంకేతికతను అందిపుచ్చుకోవడంలోనూ ఆయన ఎప్పుడూ ముందుండేవారు. విక్రమ్ చిత్రంలో కంప్యూటర్ ఆధారిత రికార్డింగ్‌లు, ఇండియన్ చిత్రంలో ప్రోస్థెటిక్ మేకప్‌ను విస్తృతంగా ఉపయోగించి సాంకేతిక విలువలను పెంచారు. సినిమా అంటే కేవలం కెమెరా ముందు నటించడం మాత్రమే కాదని, కథ, స్క్రీన్‌ప్లే, దర్శకత్వం, ఎడిటింగ్, మేకప్ వంటి అనేక విభాగాల సమ్మేళనమని ఆయన తన సినిమాల ద్వారా నిరూపించారు.

ఇప్పటివరకు దాదాపు 230కిపైగా చిత్రాల్లో నటించిన కమల్‌ హాసన్, తమిళంతో పాటు తెలుగు, మలయాళం, హిందీ, కన్నడ తదితర భాషల్లోనూ తన సత్తా చాటారు. నటుడిగానే కాకుండా దర్శకుడు, నిర్మాత, రచయిత, గాయకుడు, ఎడిటర్, కొరియోగ్రాఫర్, మేకప్ ఆర్టిస్ట్‌గా వివిధ విభాగాల్లో పని చేసి వన్ మ్యాన్ ఇండస్ట్రీగా పేరు తెచ్చుకున్నారు. ఆయన ప్రతిభను గుర్తించి దేశ విదేశాలు అనేక పురస్కారాలతో సత్కరించగా, 1978లో కళైమామణి, 1990లో పద్మశ్రీ, 2014లో పద్మభూషణ్, అలాగే ఫ్రాన్స్ ప్రభుత్వంచే చెవాలియార్ అవార్డులు అందుకున్నారు. అంతేకాకుండా ఆయన కెరీర్‌లో నటించిన లేదా అనుబంధం ఉన్న ఏడు సినిమాలు భారతదేశం తరఫున ఆస్కార్ ఎంట్రీలుగా ఎంపిక కావడం విశేషం.

1994లోనే కోటి రూపాయల పారితోషికం అందుకున్న తొలి కోలీవుడ్ నటుడిగా చరిత్ర సృష్టించిన ఆయన, ప్రస్తుతం ఒక్కో సినిమాకు భారీ స్థాయిలో రెమ్యూనరేషన్ అందుకుంటున్నారు. లోకేష్ కనగరాజ్ దర్శకత్వంలో వచ్చిన విక్రమ్ సినిమా ఆయన మార్కెట్‌ను మరింత పెంచడమే కాకుండా బాక్సాఫీస్ వద్ద రికార్డులను సృష్టించింది. వయసు పెరుగుతున్న కొద్దీ నటుడిగా మరింత పరిణతి చెందుతూ, యువ నటులకు పోటీగా కొత్త ప్రాజెక్ట్‌లను అంగీకరిస్తున్నారు. ప్రస్తుతం సూపర్‌స్టార్ రజనీకాంత్‌తో కలిసి మరోసారి తెరను పంచుకోవడానికి సిద్ధమవుతున్న ఆయన, దశాబ్దాలుగా సినిమా పరిశ్రమకు ఇస్తున్న సేవలు ఎప్పటికీ చిరస్మరణీయంగా నిలుస్తాయని సినీ విశ్లేషకులు కొనియాడుతున్నారు.

Also Read: వివేక్ ఒబెరాయ్ గొప్ప మనసు.. రామాయణం సినిమా రెమ్యునరేషన్ మొత్తం క్యాన్సర్ పిల్లలకే విరాళం!