జిమ్ జిమ్ తార సాంగ్ క్రేజ్.. సోషల్ మీడియాను ఊపేస్తున్న పర్ణశాల ఫుల్ లిరికల్ వీడియో
సూర్య ఎంటర్‌టైన్‌మెంట్ డెస్క్: గత కొద్ది రోజులుగా సోషల్ మీడియా ప్లాట్‌ఫామ్‌లలో ఎక్కడ చూసినా మారుమోగుతున్న జిమ్ జిమ్ తార జిమ్ జిమ్ తార జిలేబీ తేరా చిన్నోడా పాట ట్రెండింగ్ సెన్సేషన్‌గా మారింది. ఎలాంటి అధికారిక ప్రకటన లేకపోయినా, పూర్తి సాంగ్ బయటకు రాకముందే ఈ పాటకు సంబంధించిన చిన్న బిట్‌తో నెటిజన్లు వేల సంఖ్యలో రీల్స్, షార్ట్స్ చేస్తూ సోషల్ మీడియాను హోరెత్తించారు. ఈ భారీ క్రేజ్‌ను దృష్టిలో ఉంచుకుని చిత్ర యూనిట్ తాజాగా ఆదిత్య మ్యూజిక్ ద్వారా ఈ పాటకు సంబంధించిన ఫుల్ లిరికల్ వీడియోను అధికారికంగా విడుదల చేసింది. సాంగ్ రిలీజ్ అయిన క్షణం నుంచే యూట్యూబ్‌లో రికార్డు స్థాయి వ్యూస్‌తో దూసుకెళ్తూ సినిమాపై అంచనాలను తారాస్థాయికి చేర్చింది.
వై.జి. భరత్ దర్శకత్వంలో ఎస్‌ఎల్‌టీ ఫిలిమ్స్ బ్యానర్‌పై నిర్మాత మంచి వెంకట్ ఈ చిత్రాన్ని అత్యంత ప్రతిష్టాత్మకంగా నిర్మిస్తున్నారు. ఈ ప్రత్యేక గీతాన్ని జి. లక్ష్మిదేవి స్వయంగా రచించి, అత్యంత శక్తివంతంగా ఆలపించడం విశేషం. ఆమె గొంతులోని మాస్ వైబ్స్, క్యాచీ లిరిక్స్ శ్రోతలను ఇట్టే కట్టిపడేస్తున్నాయి. పూర్తి పాట విడుదల కాకముందే కేవలం సోషల్ మీడియాలో చక్కర్లు కొట్టిన క్లిప్స్‌తోనే సామాన్యుల నుంచి ప్రముఖ సెలబ్రిటీల వరకు అందరూ ఈ పాదాలకు స్టెప్పులేస్తూ వీడియోలు షేర్ చేయడం ఈ ట్రెండ్ ఎంత బలమైనదో తెలియజేస్తోంది.
పాట విడుదల సందర్భంగా చిత్ర దర్శకుడు వై.జి. భరత్ మాట్లాడుతూ మా పర్ణశాల సినిమా కోసం జి.లక్ష్మిదేవి గారు రాసి పాడిన జిమ్ జిమ్ తార పాటకు ప్రేక్షకుల నుంచి వస్తున్న స్పందన చూస్తుంటే ఎంతో ఆనందంగా ఉందని తెలిపారు. పూర్తి పాట విడుదల తర్వాత ఊహించినదాని కంటే ఎక్కువగానే అనూహ్య స్పందన వస్తోందని, ప్రముఖ ఆదిత్య మ్యూజిక్ ద్వారా ఈ గీతాన్ని ప్రేక్షకుల ముందుకు తీసుకురావడం మరింత సంతృప్తినిచ్చిందని ఆయన పేర్కొన్నారు. రాబోయే రోజుల్లో థియేటర్లలో ఈ పాటకు ప్రేక్షకులు విపరీతంగా ఎంజాయ్ చేస్తారని, పూర్తి పాటకు కూడా అన్ని వర్గాల నుంచి అద్భుతమైన ఆదరణ లభిస్తుందని దర్శకుడు ధీమా వ్యక్తం చేశారు.
హారర్ కామెడీతో పాటు సస్పెన్స్ థ్రిల్లర్ అంశాలను సమపాళ్లలో మేళవిస్తూ వినూత్న కథాంశంతో ఈ చిత్రం రూపుదిద్దుకుంటోంది. ఇప్పటివరకు విడుదలైన ప్రచార చిత్రాలు, తాజాగా ఈ వైరల్ సాంగ్ తెచ్చిన హైప్ సినిమాపై భారీ అంచనాలను క్రియేట్ చేశాయి. ప్రస్తుతం పోస్ట్ ప్రొడక్షన్ కార్యక్రమాలు వేగంగా జరుపుకుంటున్న ఈ చిత్రం, త్వరలోనే అన్ని వర్గాల ప్రేక్షకులను అలరించేందుకు థియేటర్లలోకి రావడానికి సర్వం సిద్ధం చేసుకుంటోంది.
