హోంబలే ఫిల్మ్స్ నుంచి మరో భారీ ప్రాజెక్ట్.. ఏఐ టెక్నాలజీతో శరణాగతి యానిమేషన్ మూవీ!

సూర్య ఎంటర్‌టైన్‌మెంట్ డెస్క్: కేజీఎఫ్, సలార్, కాంతార వంటి సంచలన పాన్ ఇండియా చిత్రాలతో దేశవ్యాప్తంగా ప్రత్యేక గుర్తింపు తెచ్చుకున్న ప్రముఖ నిర్మాణ సంస్థ హోంబలే ఫిల్మ్స్ మరో వినూత్న ప్రాజెక్ట్‌తో ప్రేక్షకుల ముందుకు రానుంది. భారతీయ చలనచిత్ర పరిశ్రమలో కొత్త సాంకేతిక ఒరవడికి శ్రీకారం చుడుతూ, అత్యాధునిక ఆర్టిఫిషియల్ ఇంటెలిజెన్స్ మరియు మోషన్ క్యాప్చర్ టెక్నాలజీతో శరణాగతి అనే ప్రతిష్టాత్మక యానిమేషన్ చిత్రాన్ని రూపొందిస్తున్నట్లు మేకర్స్ అధికారికంగా ప్రకటించారు.

ఇంటర్నేషనల్ సొసైటీ ఫర్ కృష్ణ కాన్షియస్‌నెస్ (ఇస్కాన్) వ్యవస్థాపక ఆచార్యులు హిస్ డివైన్ గ్రేస్ ఏ.సి. భక్తివేదాంత స్వామి శ్రీల ప్రభుపాదుల అసాధారణ జీవిత చరిత్ర, ఆధ్యాత్మిక ప్రస్థానం ఆధారంగా ఈ చిత్రం తెరకెక్కుతోంది. ట్రాన్స్‌సెండెంటల్ ఫిల్మ్స్ సంస్థతో కలిసి హోంబలే ఫిల్మ్స్ సంయుక్తంగా నిర్మిస్తున్న ఈ చిత్రానికి శరణాగతి - ది లైఫ్ ఆఫ్ ఎ సరెండర్డ్ సోల్ అనే ఆకర్షణీయమైన టైటిల్‌ను ఖరారు చేశారు. యానిమేషన్ పాత్రలకు అద్భుతమైన సహజత్వాన్ని, సజీవ భావోద్వేగాలను తీసుకువచ్చేందుకు అత్యాధునిక డిజిటల్ టెక్నాలజీని ఈ చిత్రంలో ఉపయోగిస్తున్నారు.

తన 69వ ఏట భారతదేశం నుంచి అమెరికాకు పయణమై, భగవద్గీత బోధనలను ప్రపంచవ్యాప్తంగా వ్యాప్తి చేయడానికి శ్రీల ప్రభుపాదులు పడిన శ్రమ, ఆయన అచంచలమైన విశ్వాసం ఈ సినిమాలో ప్రధానాంశాలుగా ఉండనున్నాయి. గౌర శక్తి దాస రచన, దర్శకత్వం వహిస్తున్న ఈ చిత్రానికి రాజేష్ సింగ్, లోహిత్ రావు నిర్మాతలుగా వ్యవహరిస్తున్నారు. శ్రీధర్ శికారిపుర విజువల్ డైరెక్టర్‌గా బాధ్యతలు నిర్వర్తిస్తుండగా, ప్రముఖ ఆధ్యాత్మిక సంస్థల ఆశీస్సులతో ఈ ప్రాజెక్ట్ అత్యున్నత ప్రమానాలతో రూపుదిద్దుకుంటోంది.

చిత్ర పరిశ్రమలో సరికొత్త ప్రయోగంగా రానున్న ఈ భారీ యానిమేషన్ చిత్రాన్ని హోంబలే ఫిల్మ్స్ ప్రపంచవ్యాప్తంగా గ్రాండ్‌గా డిస్ట్రిబ్యూట్ చేయనుంది. శ్రీల ప్రభుపాదుల వ్యాస పూజ పవిత్ర సందర్భాన్ని పురస్కరించుకుని 2027 ఆగస్టులో ఈ సినిమాను ప్రపంచవ్యాప్తంగా థియేటర్లలో విడుదల చేయనున్నట్లు మేకర్స్ తెలిపారు. భారతీయ యానిమేషన్ రంగంలోనే ఒక మైలురాయిగా నిలవనున్న ఈ చిత్రంపై ప్రస్తుతం సినీ వర్గాల్లో మరియు ఆధ్యాత్మిక ప్రేక్షకుల్లో భారీ అంచనాలు నెలకొన్నాయి.

Also Read: భారత చెస్ చరిత్రలో అరుదైన మైలురాయ.. 100వ గ్రాండ్‌మాస్టర్‌గా మధ్యప్రదేశ్ ప్లేయర్ అనూజ్ శ్రీవాస్త్రి!