'గేమ్ ఛేంజర్' ఒరిజినల్ కథపై కార్తీక్ సుబ్బరాజ్ ఆసక్తికర వ్యాఖ్యలు

రామ్ చరణ్ హీరోగా, ప్రముఖ దర్శకుడు శంకర్ తెరకెక్కించిన 'గేమ్ ఛేంజర్' చిత్రానికి తమిళ దర్శకుడు కార్తీక్ సుబ్బరాజ్ మూలకథను అందించిన విషయం తెలిసిందే. ఇటీవల ఓ ఇంటర్వ్యూలో మాట్లాడిన ఆయన, తాను శంకర్‌కు అందించిన అసలు కథ ఏంటో, అది తెరపైకి వచ్చేసరికి ఎలా మారిందో వెల్లడించారు.

కార్తీక్ సుబ్బరాజ్ మాట్లాడుతూ.. తాను రాసుకున్న కథ వ్యవస్థను మార్చే ఒక నిజాయితీ గల ఐఏఎస్ ఆఫీసర్ చుట్టూ తిరుగుతుందని చెప్పారు. హిందీ చిత్రం 'న్యూటన్' తరహాలో చాలా వాస్తవికంగా, గ్యాంగ్‌స్టర్ నేపధ్యంతో కూడిన యాక్షన్‌తో ఈ లైన్‌ను సిద్ధం చేసుకున్నట్లు తెలిపారు. తమిళ నేటివిటీకి తగ్గట్లుగా మదురై గ్యాంగ్‌స్టర్ అంశాలను, కథానాయకుడి స్నేహితుడి కీలక పాత్రను ఇందులో జోడించి రాసుకున్నానని వెల్లడించారు.

అయితే ఆ సమయంలో తాను 'మహాన్' సినిమా పనుల్లో బిజీగా ఉండటంతో కేవలం కథ మాత్రమే ఇచ్చి, స్క్రీన్‌ప్లే రాయలేకపోయానని ఆయన వివరించారు. రామ్ చరణ్ లాంటి భారీ స్టార్, శంకర్ లాంటి దిగ్గజ దర్శకుడు కాంబినేషన్‌లో వందల కోట్ల బడ్జెట్‌తో తెరకెక్కించేసరికి కథ స్వరూపం పూర్తిగా మారిపోయిందని అభిప్రాయపడ్డారు. కథలో మార్పులు వచ్చినప్పటికీ, శంకర్ లాంటి దర్శకుడు తన కథను ఎంచుకోవడం ఎంతో గర్వంగా, సంతోషంగా ఉందని ఆయన చెప్పారు.