ఈ నగరానికి ఏమైంది' సీక్వెల్ 'ఈఎన్ఈ రిపీట్'.. నలుగురి గ్యాంగ్ కొత్త పోస్టర్ వైరల్!
సూర్య ఎంటర్‌టైన్‌మెంట్ డెస్క్: టాలీవుడ్‌లో యూత్‌ఫుల్ కామెడీ ఎంటర్‌టైనర్‌గా సరికొత్త చరిత్ర సృష్టించిన 'ఈ నగరానికి ఏమైంది' చిత్రానికి సీక్వెల్‌గా రూపుదిద్దుకుంటున్న మోస్ట్ అవేటెడ్ మూవీ 'ఈఎన్ఈ రిపీట్'. సక్సెస్ ఫుల్ డైరెక్టర్ తరుణ్ భాస్కర్ దర్శకత్వంలో తెరకెక్కుతున్న ఈ కల్ట్ సీక్వెల్‌లో విశ్వక్ సేన్, అభినవ్ గోమఠం, వెంకటేష్ కాకుమాను, శ్రీనాథ్ మాగంటి ప్రధాన పాత్రలలో నటిస్తున్నారు. ఎస్ ఒరిజినల్స్ మరియు రూట్‌నోడ్ సినిమా బ్యానర్లపై సృజన్ యరబోలు, సందీప్ నాగిరెడ్డి సంయుక్తంగా ఈ భారీ ప్రాజెక్ట్‌ను నిర్మిస్తున్నారు. తాజాగా ఈ చిత్రం నుంచి మేకర్స్ ఒక ఆసక్తికరమైన కొత్త పోస్టర్‌ను విడుదల చేశారు.
తాజాగా విడుదలైన ఈ పోస్టర్‌లో విశ్వక్ సేన్, అభినవ్ గోమఠం, వెంకటేష్ కాకుమాను మరియు శ్రీనాథ్ మాగంటి నలుగురూ సూట్‌కేసులు, ట్రావెల్ బ్యాగులు, కెమెరా పరికరాలతో కూడిన లగేజీ మధ్య సరదా హావభావాలతో కనిపిస్తున్నారు. విశ్వక్ సేన్ వివేక్ పాత్రలో సన్‌గ్లాసెస్ ధరించి స్టైలిష్‌గా కనిపిస్తుండగా, అభినవ్ గోమఠం కౌశిక్ పాత్రలో ఆశ్చర్యపోతున్నట్లుగా ఉన్న లుక్ ఆకట్టుకుంటోంది. అలాగే వెంకటేష్ కాకుమాను ఉప్పిగా, శ్రీనాథ్ మాగంటి కార్తీక్ పాత్రలో కెమెరాతో దర్శనమిస్తున్నారు. లగేజీ మరియు ఫిల్మ్ మేకింగ్ పరికరాలతో నిండిన ఈ పోస్టర్ సినిమాలో ఉండబోయే సందడిని, వినోదాన్ని ముందే సూచిస్తోంది.
2018లో విడుదలైన 'ఈ నగరానికి ఏమైంది' చిత్రం యువతలో విపరీతమైన కల్ట్ ఫాలోయింగ్‌ను సొంతం చేసుకుంది. ఫ్రెండ్‌షిప్, కామెడీ, లైవ్‌లీ డైలాగ్స్‌తో ఆకట్టుకున్న ఈ సినిమా ఇటీవల థియేటర్లలో రీ-రిలీజ్ అయి కూడా సంచలన విజయాన్ని నమోదు చేసింది. ఇప్పుడు ఎనిమిదేళ్ల విరామం తర్వాత అదే గ్యాంగ్ మళ్లీ తెరపైకి వస్తుండటంతో ప్రేక్షకుల్లో అంచనాలు రెట్టింపయ్యాయి. వివేక్ సాగర్ సంగీతం సమకూరుస్తున్న ఈ చిత్రానికి ఏజే ఆరోన్ సినిమాటోగ్రాఫర్‌గా వ్యవహరిస్తున్నారు.
అన్ని కార్యక్రమాలను పూర్తి చేసుకుని 'ఈఎన్ఈ రిపీట్' చిత్రాన్ని నవంబర్ 19, 2026న ప్రపంచవ్యాప్తంగా థియేటర్లలో గ్రాండ్‌గా విడుదల చేయడానికి మేకర్స్ సన్నాహాలు చేస్తున్నారు. మొదటి భాగంలో చూపించిన స్నేహం మరియు వినోదాన్ని సరికొత్త కథతో మరింత రెట్టింపు స్థాయిలో ఈ సీక్వెల్‌లో అందించబోతున్నట్లు చిత్ర యూనిట్ ధీమా వ్యక్తం చేస్తోంది. బాక్సాఫీస్ వద్ద ఈ యూత్‌ఫుల్ గ్యాంగ్ ఎలాంటి రికార్డులు సృష్టిస్తుందో వేచి చూడాలి.
