అన్ను కపూర్ వ్యాఖ్యలపై స్పందించిన తమన్నా భాటియా
నటుడు అన్ను కపూర్ గతంలో తమన్నా భాటియా రూపురేఖలపై చేసిన 'దూధియా బదన్' వ్యాఖ్యలు నెట్టింట తీవ్ర చర్చకు దారితీసిన సంగతి తెలిసిందే. తాజాగా ఓ కార్యక్రమంలో పాల్గొన్న తమన్నా, ఈ వివాదంపై మొదటిసారి స్పందించారు. అనవసరమైన విషయాలకు ప్రాధాన్యత ఇవ్వడం కంటే తన పనిపై దృష్టి పెట్టడమే తనకు ముఖ్యమని ఈ సందర్భంగా ఆమె స్పష్టం చేశారు.
ఆమె మాట్లాడుతూ.. "మన వినే మాటల్లో ఏవి తీసుకోవాలో, ఏవి వదిలేయాలో స్పష్టత ఉండాలి. మనం ఇలాంటి వ్యాఖ్యలకు ఎక్కువ ప్రాధాన్యత ఇస్తూ పోతే జీవితంలో ముందుకు సాగలేము. అందుకే నేను ఇలాంటి విషయాలను పట్టించుకోను, కేవలం నా నటన, నా కెరీర్ మరియు నేను చేసే పనిపై మాత్రమే దృష్టి సారిస్తాను" అని తెలిపారు.
తన వృత్తిని ఒక బాధ్యతగా, సేవగా భావించి మనస్ఫూర్తిగా పని చేస్తానని, అందుకే ఆ కష్టం ప్రేక్షకులకు చేరుతుందనే నమ్మకం తనకు ఉందని తమన్నా పేర్కొన్నారు. కాగా, అన్ను కపూర్ గతంలో ఒక పాటను చూస్తూ చేసిన ఈ వ్యాఖ్యలపై విమర్శలు రాగా, తాను ఎలాంటి తప్పుడు ఉద్దేశంతో ఆ మాట అనలేదని ఆ తర్వాత వివరణ ఇచ్చారు.
