విశాఖను ఫిల్మ్ హబ్‌గా తీర్చిదిద్దుతాం
విశాఖపట్నం: ఆంధ్రప్రదేశ్‌లో తెలుగు చిత్ర పరిశ్రమ అభివృద్ధిపై రాష్ట్ర ఐటీ, విద్యాశాఖ మంత్రి నారా లోకేష్, ప్రముఖ నటుడు, నిర్మాత రానా దగ్గుబాటి మధ్య ఆసక్తికర సంభాషణ జరిగింది. CII సమ్మిట్‌లో భాగంగా జరిగిన ఒక చర్చా వేదికపై వీరిద్దరూ సినీ పరిశ్రమ భవిష్యత్తుపై తమ అభిప్రాయాలను పంచుకున్నారు.
ఈ సందర్భంగా రానా మాట్లాడుతూ.. ఆంధ్రప్రదేశ్‌కు ఫిల్మ్ ఇండస్ట్రీని తీసుకురావడానికి ప్రభుత్వం తరఫున ఎలాంటి ప్రయత్నాలు జరుగుతున్నాయని మంత్రి లోకేష్‌ను ప్రశ్నించారు. దీనిపై లోకేష్ సానుకూలంగా స్పందిస్తూ.. విశాఖపట్నానికి చిత్ర పరిశ్రమను తీసుకురావడానికి తాము చిత్తశుద్ధితో ప్రయత్నిస్తున్నామని తెలిపారు. కేవలం షూటింగ్‌లకే పరిమితం కాకుండా, హైదరాబాద్ తరహాలో విశాఖలో కూడా పూర్తిస్థాయి 'ఫిల్మ్ ఎకో సిస్టమ్' (స్టూడియోలు, పోస్ట్ ప్రొడక్షన్, మౌలిక సదుపాయాలు) క్రియేట్ చేయాల్సిన అవసరం ఉందని ఆయన అభిప్రాయపడ్డారు.
ఈ బృహత్తర లక్ష్యాన్ని సాధించేందుకు సినీ పరిశ్రమ పెద్దలు ముందుకు రావాలని లోకేష్ పిలుపునిచ్చారు. మంత్రి ప్రతిపాదనపై రానా హర్షం వ్యక్తం చేస్తూ, ఏపీలో చిత్ర పరిశ్రమ అభివృద్ధికి ప్రభుత్వంతో కలిసి పనిచేసేందుకు తాము సిద్ధంగా ఉన్నామని స్పష్టం చేశారు. విశాఖను సినీ కేంద్రంగా మార్చేందుకు ఇరువురి మధ్య జరిగిన ఈ చర్చ ప్రస్తుతం ప్రాధాన్యత సంతరించుకుంది.
