విజయనగరం లో తొలిరోజు 18 నామినేషన్లు

విజయనగరం, సూర్య : నగరపాలక సంస్థ ఎన్నికల ప్రక్రియలో భాగంగా ఈరోజు కార్యాలయం నందు నామినేషన్ల స్వీకరణ ప్రక్రియ జరిగింది. ఉదయం 11 గంటల నుండి మధ్యాహ్నం 3 గంటల వరకు జరిగిన ఈ ప్రక్రియలో మొత్తం 19 నామినేషన్లు దాఖలు అయ్యాయి. మేయర్ అభ్యర్థిగా ఒకరు నామినేషన్ దాఖలు చేయగా, వార్డు మెంబర్లుగా 18 మంది తమ నామినేషన్లు దాఖలు చేశారు. ఇందుకోసం కార్యాలయం మొదటి అంతస్థులో 8 కౌంటర్లు, రెండవ అంతస్తులో 8 కౌంటర్లు, 1 మేయర్ అభ్యర్థి కౌంటర్ ను ఏర్పాటు చేశారు. నామినేషన్ ప్రక్రియకు ముందు కమిషనర్ బాలస్వామి అన్ని కౌంటర్ల వద్దకు వెళ్లి ఏర్పాట్లను పరిశీలించారు. అనంతరం ఆయన మాట్లాడుతూ నామినేషన్ల స్వీకరణ ప్రక్రియ మరో రెండు రోజులపాటు జరగనుందని తెలిపారు. ఎన్నికల సంఘం ఆదేశించిన నిబంధనలకు లోబడి నామినేషన్ దాఖలుకు అవసరమైన అన్ని పత్రాలను అభ్యర్థులు సిద్ధం చేసుకోవాలన్నారు. నామినేషన్ కేంద్రానికి అనగా నగరపాలక సంస్థ కార్యాలయానికి నిర్దేశించిన 100 మీటర్ల పరిధిలో అభ్యర్థితో సహా మరో ఇద్దరిని మాత్రమే అనుమతించబడునని తెలిపారు. ఇతరులను అనుమతించబోమని స్పష్టం చేశారు. నిబంధనలు అతిక్రమించిన వారి పట్ల వీడియోగ్రఫీ ద్వారా చిత్రీకరించిన దృశ్యాలను ఆధారంగా చేసుకుని పోలీసు కేసులు నమోదు చేస్తామని స్పష్టం చేశారు. అందరి సమన్వయంతో ఎన్నికలు సమర్ధవంతంగా నిర్వహించేందుకు కృషి చేస్తున్నామని వెల్లడించారు.

రిపోర్టర్ :  డేవిడ్ రాజు, విజయనగరం.