వెల్దుర్తి మండలంలో అస్తవ్యస్తంగా పారిశుధ్యం.. పట్టించుకోని అధికారులు

వెల్దుర్తి (సూర్య ప్రతినిధి రూలర్ మేజర్ న్యూస్):మండల పరిధిలోని గోవర్ధనగిరి గ్రామంలో పారిశుధ్య నిర్వహణ పూర్తిగా అస్తవ్యస్తంగా తయారైంది. గ్రామంలో ఎక్కడ చూసినా మురికి కాలువలు చెత్తతో నిండిపోయి దర్శనమిస్తున్నాయి. గ్రామ పంచాయతీ అధికారుల నిర్లక్ష్యంతో "ఎక్కడ వేసిన గొంగళి అక్కడే" అన్న చందంగా గ్రామంలో సమస్యలు తిష్టవేశాయి తప్ప ఎలాంటి మార్పు కనిపించడం లేదు.గ్రామంలోని ప్రధాన వీధుల్లో మురికి కాలువలు సక్రమంగా శుభ్రం చేయకపోవడంతో డ్రైనేజీ నీరు రోడ్లపైకి ప్రవహిస్తోంది. దీంతో ఇళ్ల నుంచి వచ్చే మురుగునీరు రోడ్లపైనే నిలిచిపోయి దుర్వాసన వెదజల్లుతోంది. అంతేకాకుండా, రోడ్ల పక్కనే చెత్తాచెదారం కుప్పలు కుప్పలుగా పేరుకుపోయినా అధికారులు, సిబ్బంది పట్టించుకోవడం లేదని గ్రామస్తులు ఆవేదన వ్యక్తం చేస్తున్నారు.దోమల బెడద విపరీతంగా పెరిగిపోవడంతో పాటు కలుషిత వాతావరణం కారణంగా గ్రామంలో జ్వరాలు, ఇతర అంటువ్యాధులు ప్రబలే అవకాశం ఉందని ప్రజలు ఆందోళన చెందుతున్నారు. ఇప్పటికైనా జిల్లా మరియు మండల అధికారులు స్పందించి, గోవర్ధనగిరి గ్రామంలో ప్రత్యేక పారిశుధ్య డ్రైవ్ నిర్వహించి మురికి కాలువలను శుభ్రం చేయించాలని, రోడ్లపై పేరుకుపోయిన చెత్తను తొలగించాలని గ్రామస్తులు కోరుతున్నారు.

సూర్య ప్రతినిధి కే రాజశేఖర్