వరి పంటలను కాపాడుకోవడానికి రైతులకు జాగ్రత్తలు అవసరం

ఆమదాలవలస, అక్టోబర్ 29, మేజర్ న్యూస్ 
తుఫాన్ కారణంగా ఆమదాలవలస మండలంలో ఇటీవల కురిసిన వర్షాల నేపథ్యంలో వరి పంటలు దెబ్బతినకుండా రైతులు తగిన జాగ్రత్తలు తీసుకోవాలని మండల వ్యవసాయ అధికారి మెట్ట మోహనరావు సూచించారు.
ఈ మేరకు దూసి, తోగరం, నిమ్మతోర్లవాడ, నెల్లిపర్తి, కలివరం, శ్రీనివాసాచార్యులపేట గ్రామాల్లో పర్యటించి వరి పంటలను పరిశీలించారు. ఈ సందర్భంగా రైతులకు పలు వ్యవసాయ సూచనలు చేశారు. వరి పొలాల్లో నిల్వ ఉన్న నీటిని వెంటనే బయటకు పంపాలి. నీరు సులభంగా బయటకు వెళ్లేలా కాలువలను శుభ్రం చేసుకోవాలి. పడిపోయిన వరి పంటను జాగ్రత్తగా కట్టలుగా కట్టి నిలబెట్టుకోవాలి. అగ్గి తెగులు లక్షణాలు కనిపిస్తే, వ్యవసాయ శాఖ సూచనల మేరకు ఎకరాకు 120 గ్రాముల ట్రైసైక్లజోల్ పిచికారీ చేయాలి. కుళ్లు తెగులు లక్షణాలు కనిపించినప్పుడు, అధికారుల సూచనల మేరకు ఎకరాకు 400 మి.లీ. హెక్సాకొనజోల్ పిచికారీ చేయాలి. వర్షాలకు తడిసిన వరి పంటను పరిశీలించి, పంట పరిస్థితిని బట్టి 5 శాతం ఉప్పు ద్రావణం పిచికారి చేయాలి 
రైతులు తమ పొలాలను క్రమం తప్పకుండా పరిశీలిస్తూ, తెగుళ్ల లక్షణాలు కనిపించిన వెంటనే వ్యవసాయ శాఖ అధికారులను సంప్రదించాలని సూచించారు. వ్యవసాయ శాఖ సూచనలు పాటించి పంట నష్టాన్ని తగ్గించుకోవాలని రైతులకు విజ్ఞప్తి చేశారు.