వాహనాల అతివేగానికి కళ్లెం...?
--- లేజర్ గన్ లతో పరిశీలన
--- రూల్స్ అతిక్రమిస్తే తాట తీస్తాం
--- పోలీసుల హెచ్చరిక...!
ఆనందపురం:26సెప్టెంబర్ మేజర్ న్యూస్.
రహదారి భద్రతకు విఘాతం కలిగించే అతివేగం, హెల్మెట్ లేకుండా ప్రయాణం, వాహనం నడుపుతూ సెల్ఫోన్ వినియోగం, ట్రిపుల్ రైడింగ్ వంటి నిబంధనల ఉల్లంఘనలపై ట్రాఫిక్ పోలీసులు కొరడా ఝళిపించారు. విశాఖపట్నం పోలీస్ కమిషనర్ శంఖబ్రత బాగ్చి ఆదేశాలు, అదనపు డీసీపీ (ట్రాఫిక్), ఏసీపీ (ట్రాఫిక్) సూచనల మేరకు భీమిలి క్రాస్రోడ్డు నుంచి ఆనందపురం వైపు వచ్చే ప్రధాన రహదారిపై శనివారం ప్రత్యేక తనిఖీలు నిర్వహించారు.
నార్త్ ట్రాఫిక్ సీఐ సీహెచ్. ఉమాకాంత్, ఆనందపురం ట్రాఫిక్ ఎస్ఐ పి. పాపారావు సిబ్బందితో కలిసి ఈ ప్రత్యేక డ్రైవ్ చేపట్టారు. సిపి బాగ్చి సమకూర్చిన అత్యాధునిక స్పీడ్ లేజర్ గన్ను వినియోగిస్తూ రహదారిపై వాహనాల వేగాన్ని పరిశీలించారు. పరిమితికి మించి వేగంతో ప్రయాణిస్తున్న వాహనాలను సాంకేతిక పరికరం ద్వారా గుర్తించి, నిబంధనల ప్రకారం చర్యలు చేపట్టారు.
అదేవిధంగా ద్విచక్ర వాహనదారులు హెల్మెట్ ధరించారా? వాహనం నడుపుతూ సెల్ఫోన్ వినియోగిస్తున్నారా? ఒకే ద్విచక్ర వాహనంపై ముగ్గురు ప్రయాణిస్తున్నారా? తదితర అంశాలను పోలీసులు క్షుణ్ణంగా పరిశీలించారు. ప్రత్యేక తనిఖీల్లో నిబంధనలు ఉల్లంఘించిన సుమారు 100 మంది వాహనదారులను గుర్తించి, వారిపై మోటారు వాహనాల చట్టం ప్రకారం జరిమానాలు విధించారు.
వాహనదారులు రహదారి భద్రతా నిబంధనలను తప్పనిసరిగా పాటించాలని పోలీసులు సూచించారు. అతివేగం కారణంగా ప్రమాదాల తీవ్రత పెరిగే అవకాశం ఉన్నందున వాహనాలను నిర్దేశిత వేగ పరిమితిలోనే నడపాలని స్పష్టం చేశారు. ద్విచక్ర వాహనదారులు తప్పనిసరిగా నాణ్యమైన హెల్మెట్ ధరించాలని, వాహనం నడుపుతున్న సమయంలో సెల్ఫోన్ వినియోగించరాదని సూచించారు. ఒకే వాహనంపై పరిమితికి మించి ప్రయాణించడం ప్రమాదకరమని హెచ్చరించారు.
రహదారులపై ప్రమాదాలను నియంత్రించడంతోపాటు వాహనదారుల్లో నిబంధనలపై అవగాహన పెంచేందుకు ప్రత్యేక తనిఖీలు నిర్వహిస్తున్నట్లు పోలీసులు తెలిపారు. భవిష్యత్తులోనూ నిబంధనలు ఉల్లంఘించే వాహనదారులపై చర్యలు కొనసాగుతాయని పేర్కొన్నారు.
