కమలాపురం రైలు నిలుపుదలపై కేంద్ర మంత్రికి వినతి.. రైళ్ల పునరుద్ధరణకు కేంద్ర మంత్రి రామ్మోహన్ నాయుడు, ఎంపీ సీఎం రమేష్ నాయుడు - హామీ

కమలాపురం రైలు నిలుపుదలపై కేంద్ర మంత్రికి వినతి..

రైళ్ల పునరుద్ధరణకు కేంద్ర మంత్రి రామ్మోహన్ నాయుడు, ఎంపీ సీఎం రమేష్ నాయుడు - హామీ

కమలాపురం మేజర్ న్యూస్

కడప జిల్లాకు విచ్చేసిన కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు, ఎంపీ సి.ఎం. రమేష్ నాయుడులను రాష్ట్ర టీడీపీ ఉపాధ్యక్షులు పుత్తా నరసింహా రెడ్డి ఆధ్వర్యంలో కమలాపురం రైలు నిలుపుదల సాధన కమిటీ సభ్యులు మర్యాదపూర్వకంగా కలిసి వినతిపత్రం సమర్పించారు. కోవిడ్‌ సమయంలో కమలాపురం రైల్వే స్టేషన్‌లో పలు రైళ్లకు ఉన్న నిలుపుదలలను తొలగించారని, కోవిడ్‌ అనంతరం పరిస్థితులు సాధారణమైనప్పటికీ వాటిని తిరిగి పునరుద్ధరించలేదని కమిటీ సభ్యులు కేంద్ర మంత్రి రామ్మోహన్ నాయుడు, ఎంపీ సి.ఎం. రమేష్ నాయుడు దృష్టికి తీసుకెళ్లారు. కమలాపురం ప్రజలు, పరిసర ప్రాంతాల ప్రయాణికులు ఎదుర్కొంటున్న ఇబ్బందులను వివరించి, గతంలో నిలిచిన అన్ని రైళ్లకు తిరిగి నిలుపుదల కల్పించాలని కోరారు. కమలాపురం రైల్వే సమస్యపై కేంద్ర మంత్రి రామ్మోహన్ నాయుడు సానుకూలంగా స్పందించి, గతంలో కమలాపురంలో నిలిచిన రైళ్లను తిరిగి ఆపేలా చర్యలు తీసుకుంటామని హామీ ఇచ్చినట్లు కమిటీ సభ్యులు తెలిపారు. అలాగే ఎంపీ సి.ఎం. రమేష్ నాయుడు కూడా రైళ్ల నిలుపుదల సమస్యపై సానుకూలంగా స్పందించి, సమస్య పరిష్కారానికి తనవంతు సహకారం అందిస్తామని హామీ ఇచ్చినట్లు పేర్కొన్నారు. ఈ సందర్భంగా రైలు నిలుపుదల సాధన కమిటీ సభ్యులు సురేష్ బాబు, జూటూరు విజయ్, వెదురూరు చంద్రశేఖర్ మాట్లాడుతూ కమలాపురం రైల్వే స్టేషన్‌లో గతంలో ఉన్న రైళ్ల నిలుపుదలలను వీలైనంత త్వరగా పునరుద్ధరించేలా చర్యలు తీసుకోవాలని కోరారు. ప్రజల రవాణా అవసరాలను దృష్టిలో ఉంచుకుని రైళ్ల నిలుపుదల సమస్యకు త్వరితగతిన పరిష్కారం లభించాలని ఆకాంక్షించారు..