తిరుపతి విద్యార్థులకు అరుదైన గౌరవం -రాష్ట్రపతితో ముఖాముఖి...విద్యార్థులకు ప్రశంసల వెల్లువ
ఎడ్యుకేషన్ స్టాఫ్ రిపోర్టర్ : బాలల దినోత్సవం సందర్భంగా తిరుపతికి చెందిన బి.జి.ఎస్.విజ్ఞాతం పాఠశాల విద్యార్థులకు అరుదైన గౌరవం దక్కింది. ఈనెల 14వ తేదీ ఆ పాఠశాలకు చెందిన ఇద్దరు విద్యార్థులు దేశ ప్రథమ పౌరురాలు, రాష్ట్రపతి ద్రౌపది ముర్మును రాష్ట్రపతి భవన్ లో మర్యాదపూర్వకంగా కలుసుకున్నారు.ఈ అరుదైన అవకాశాన్ని బిజియస్ విజ్ఞాపం పాఠశాలలో పదో తరగతి విద్యార్థిని బి.యామిని ప్రియ, ఏడో తరగతి విద్యార్థి పి.లహితీష్ నాయక్ సొంతం చేసుకున్నారు. రాష్ట్రపతి ద్రౌపది ముర్ము విద్యార్థులతో ఎంతో ఆప్యాయంగా ముచ్చటించి, వారి అభిరుచులు, ఆలోచనలు, భవిష్యత్తు లక్ష్యాలను అడిగి తెలుసుకున్నారు. జీవితంలో ఉన్నత శిఖరాలను అధిరోహించాలంటే క్రమశిక్షణ, పట్టుదల, ఆత్మవిశ్వాసం ఎంతో అవసరమని సూచిస్తూ వారిలో స్ఫూర్తి నింపారు. దేశ అత్యున్నత పదవిలో ఉన్న రాష్ట్రపతిని నేరుగా కలుసుకుని, ఆమెతో తమ అభిప్రాయాలను పంచుకోవడం విద్యార్థులకు జీవితాంతం గుర్తుండిపోయే మధురానుభూతిగా నిలిచింది. రాష్ట్రపతి అందించిన ప్రోత్సాహం, విలువైన సూచనలు తమ భవిష్యత్తు లక్ష్యాల సాధనకు ఎంతో దోహదపడతాయని విద్యార్థులు ఆనందం వ్యక్తం చేశారు. శ్రీశ్రీశ్రీ నిర్మలానందనాథ స్వామీజీ ఆశీస్సులు, మార్గదర్శకత్వంతో ఈ విశిష్ట కార్యక్రమం సాకారమైంది. పాఠశాల డైరెక్టర్ రవిచంద్ర ప్రత్యేక ప్రోత్సాహం, ప్రిన్సిపాల్ సరిత అరబి నేతృత్వంలో విద్యార్థులకు ఈ అరుదైన అవకాశం లభించింది. విద్యార్థుల్లో పుస్తక జ్ఞానంతో పాటు నాయకత్వ లక్షణాలు, దేశభక్తి, సామాజిక బాధ్యత, ఉన్నత ఆశయాలను పెంపొందించడమే లక్ష్యంగా బి.జి.ఎస్. విజ్ఞాతం పాఠశాల నిరంతరం కృషి చేస్తోందని పాఠశాల యాజమాన్యం పేర్కొంది. రాష్ట్రపతితో విద్యార్థుల ఈ ప్రత్యేక భేటీ పాఠశాలకే కాకుండా తిరుపతి విద్యారంగానికి కూడా గర్వకారణంగా నిలిచింది.
సీఎం గౌడ్ తిరుపతి స్టాప్ రిపోర్టర్