టీడీపీ - బీజేపీ శ్రేణుల మధ్య రాళ్లదాడి

కర్నూలు :కర్నూలు జిల్లా చిప్పగిరి మండలం గుమ్మనూరు గ్రామంలో స్థానిక సంస్థల ఎన్నికల పోలింగ్ సందర్భంగా తీవ్ర ఉద్రిక్తత చోటుచేసుకుంది. పోలింగ్ ఏజెంట్ నియమకానికి సంబంధించిన విషయంలో ఎన్డీయే కూటమి భాగస్వామ్య పక్షాలైన తెలుగుదేశం పార్టీ (టీడీపీ), భారతీయ జనతా పార్టీ (బీజేపీ) నాయకుల మధ్య తీవ్ర విభేదాలు భగ్గుమన్నాయి.

బూత్‌లోకి వెళ్తున్న ఏజెంట్ విషయంలో బీజేపీ నాయకుడు గుమ్మనూరు నారాయణ వర్గానికి, టీడీపీ నాయకుడు హంపయ్య వర్గానికి మధ్య తొలుత తీవ్ర వాగ్వాదం ప్రారంభమైంది. ఈ క్రమంలో ఇరువర్గాలకు చెందిన కార్యకర్తలు కర్రలు, రాళ్లతో పరస్పరం దాడులకు తెగబడ్డారు. ఒకరిపై ఒకరు కారంపొడి చల్లుకుంటూ దాడులు చేసుకోవడంతో గ్రామంలో తీవ్ర భయాందోళనలు నెలకొన్నాయి.

ఈ హింసాత్మక ఘర్షణల్లో ఇరువర్గాలకు చెందిన దాదాపు 20 మంది కార్యకర్తలకు గాయాలయ్యాయి. సమాచారం అందుకున్న పోలీసులు వెంటనే ఘటనా స్థలానికి చేరుకుని ఇరువర్గాలను చెదరగొట్టి పరిస్థితిని అదుపులోకి తీసుకొచ్చారు. బాధితులను స్థానిక ఆసుపత్రికి తరలించి చికిత్స అందిస్తున్నారు. అదనపు బలగాలను మోహరించి గ్రామంలో శాంతిభద్రతలను పర్యవేక్షిస్తున్నారు.