అధికారులు, ఎస్ఈసీ మాఫియాలా మారారు..

అమరావతి :వైఎస్సార్ కాంగ్రెస్ పార్టీ అధినేత వైఎస్ జగన్‌మోహన్‌రెడ్డి తెలుగుదేశం ప్రభుత్వంపై, ఎన్నికల అధికారుల తీరుపై తీవ్ర స్థాయిలో విరుచుకుపడ్డారు. రాష్ట్రంలో కలెక్టర్లు, ఎస్పీలు, డీఎస్పీలు, రిటర్నింగ్ అధికారులు (ఆర్వోలు) అందరూ ఒక మాఫియాలా తయారై ఎన్నికల అక్రమాలకు పాల్పడ్డారని ఆయన తీవ్ర ఆరోపణలు చేశారు. రాష్ట్ర ఎన్నికల కమిషన్ (ఎస్ఈసీ) కూడా ముఖ్యమంత్రి చంద్రబాబు నాయుడికి తొత్తుగా మారి, ఈ ఎన్నికల అక్రమాలకు తెరలేపిందని మండిపడ్డారు.

పారదర్శకంగా, ప్రజాస్వామ్యబద్ధంగా ఎన్నికలకు వెళ్లే ధైర్యం చంద్రబాబుకు లేకపోవడం వల్లే ఈ అక్రమాలకు ఒడిగట్టారని జగన్ ధ్వజమెత్తారు. వైఎస్సార్సీపీకి చెందిన పలువురు నేతలను, అభ్యర్థులను నామినేషన్లు వేయకుండా అడ్డుకున్నారని ఆరోపించారు. పోలింగ్ రోజున బూత్‌లలోకి దౌర్జన్యంగా చొచ్చుకెళ్లి రిగ్గింగ్ చేసిన ఘటనలు కోకొల్లలుగా ఉన్నాయని తెలిపారు. అలాగే జడ్పీటీసీ, ఎంపీటీసీ ఎన్నికలలో కూడా తమ పార్టీ అభ్యర్థులను నామినేషన్లు దాఖలు చేయనీయకుండా అడ్డుకున్నారని వైఎస్ జగన్ తీవ్ర ఆగ్రహం వ్యక్తం చేశారు.