సీఎం చంద్రబాబు, డిప్యూటీ సీఎం పవన్ కీలక భేటీ: స్థానిక సంస్థల ఎన్నికలే లక్ష్యంగా కూటమి దిశానిర్దేశం

అమరావతి,సూర్య ప్రతినిధి: ఆంధ్రప్రదేశ్ ముఖ్యమంత్రి నారా చంద్రబాబు నాయుడు, ఉపముఖ్యమంత్రి పవన్ కల్యాణ్ మధ్య నివాస ప్రాంగణంలో జరిగిన కీలక భేటీ ముగిసింది. సుమారు రెండు గంటల పాటు కొనసాగిన ఈ సమావేశంలో ప్రధానంగా రాబోయే స్థానిక సంస్థల ఎన్నికల వ్యూహాలు, సమన్వయంపై ఇరువురు నేతలు సుదీర్ఘంగా చర్చించారు.

సార్వత్రిక ఎన్నికల్లో తిరుగులేని విజయం సాధించినట్లే, రాబోయే స్థానిక సంస్థల ఎన్నికల్లోనూ ఎన్డీయే కూటమి వంద శాతం విజయభేరి మోగించాలనే లక్ష్యంతో పనిచేయాలని నిర్ణయించారు. సీట్ల సర్దుబాటు, నియోజకవర్గాల వారీగా బలాబలాలు, మేయర్ మరియు చైర్‌పర్సన్ స్థానాల్లో పోటీ, క్షేత్రస్థాయిలో తెలుగుదేశం, జనసేన, బీజేపీ శ్రేణుల మధ్య సంపూర్ణ సమన్వయం సాధించడంపై ముఖ్యమంత్రి, డిప్యూటీ సీఎంలు దిశానిర్దేశం చేశారు. కూటమిలోని అన్ని భాగస్వామ్య పక్షాలు ఐక్యంగా ముందుకు సాగేలా కార్యాచరణ రూపొందించుకోవాలని ఈ సందర్భంగా స్పష్టం చేశారు.