గ్రామీణ ప్రజలకు చేరువగా వైద్య సేవలు
265 విలేజ్‌ హెల్త్‌ క్లినిక్‌లను వర్చువల్‌గా ప్రారంభించిన ప్రభుత్వం
మార్కాపురం మేజర్ న్యూస్
రాష్ట్రవ్యాప్తంగా గ్రామీణ ప్రజలకు నాణ్యమైన వైద్య సేవలను మరింత చేరువ చేసేందుకు ప్రభుత్వం చేపట్టిన కార్యక్రమంలో భాగంగా 265 విలేజ్‌ హెల్త్‌ క్లినిక్‌ల ప్రారంభోత్సవ కార్యక్రమాన్ని నిర్వహించింది. ఇందులో భాగంగా మంగళవారం మార్కాపురం కలెక్టరేట్‌లో ఏర్పాటు చేసిన వర్చువల్‌ కార్యక్రమంలో జిల్లా కలెక్టర్‌ ఎం. విజయసునీత, మార్కాపురం ఎమ్మెల్యే కందుల నారాయణరెడ్డి, గిద్దలూరు ఎమ్మెల్యే ముత్తుముల అశోక్‌రెడ్డి పాల్గొన్నారు.వర్చువల్‌ విధానంలో రాష్ట్రస్థాయి కార్యక్రమం ద్వారా విలేజ్‌ హెల్త్‌ క్లినిక్‌లను ప్రారంభించారు. గ్రామీణ ప్రాంతాల్లోని ప్రజలు చిన్నచిన్న అనారోగ్య సమస్యలకు సైతం దూర ప్రాంతాల్లోని ఆసుపత్రులకు వెళ్లాల్సిన అవసరం లేకుండా స్థానికంగానే ప్రాథమిక వైద్య సేవలు అందించాలనే లక్ష్యంతో ఈ క్లినిక్‌లను ఏర్పాటు చేస్తున్నట్లు అధికారులు తెలిపారు.విలేజ్‌ హెల్త్‌ క్లినిక్‌ల ద్వారా సాధారణ అనారోగ్యాలకు వైద్య పరీక్షలు, ప్రాథమిక చికిత్స, అవసరమైన మందుల పంపిణీ, గర్భిణులు, బాలింతలు, చిన్నారులకు ఆరోగ్య సేవలు, దీర్ఘకాలిక వ్యాధులపై పర్యవేక్షణ వంటి సేవలు ప్రజలకు అందుబాటులోకి రానున్నాయి. అవసరమైన సందర్భాల్లో మెరుగైన వైద్యం కోసం సమీపంలోని ప్రాథమిక ఆరోగ్య కేంద్రాలు, ప్రభుత్వ ఆసుపత్రులకు రోగులను రిఫర్‌ చేయనున్నారు.ఈ సందర్భంగా కలెక్టర్‌ విజయసునీత మాట్లాడుతూ గ్రామీణ ప్రాంతాల్లో ప్రతి ఒక్కరికీ ప్రాథమిక వైద్యం అందుబాటులో ఉండేలా ప్రభుత్వం చర్యలు తీసుకుంటోందన్నారు. విలేజ్‌ హెల్త్‌ క్లినిక్‌లను ప్రజలు సద్వినియోగం చేసుకునేలా వైద్య ఆరోగ్యశాఖ అధికారులు, సిబ్బంది విస్తృతంగా అవగాహన కల్పించాలని సూచించారు.కార్యక్రమంలో వైద్య ఆరోగ్యశాఖ అధికారులు, సిబ్బంది, ఇతర సంబంధిత శాఖల అధికారులు పాల్గొన్నారు.
