సౌర విద్యుత్‌పై అవగాహనకు ‘సేవా సేతు అభియాన్‌’

బాపట్ల, మేజర్ న్యూస్:

కేంద్ర ప్రభుత్వం అమలు చేస్తున్న ‘పీఎం–సూర్యఘర్‌: ముఫ్త్‌ బిజిలీ యోజన’పై ప్రజలకు అవగాహన కల్పించే ‘సేవా సేతు అభియాన్‌’ పాంప్లెట్‌ను బాపట్ల ఎమ్మెల్యే వేగేశన నరేంద్ర వర్మ రాజు ఆవిష్కరించారు. ఈ సందర్భంగా ఆయన మాట్లాడుతూ.. ప్రజలకు ప్రభుత్వ సేవలను చేరువ చేయడమే అభియాన్‌ లక్ష్యమన్నారు. ఇళ్లపై సోలార్‌ రూఫ్‌టాప్‌ ప్యానెళ్ల ఏర్పాటుకు కేంద్ర ప్రభుత్వం సబ్సిడీ అందిస్తోందని తెలిపారు. 1 కిలోవాట్‌కు రూ.30 వేలు, 2 కిలోవాట్లకు రూ.60 వేలు, 3 కిలోవాట్లు అంతకంటే ఎక్కువ సామర్థ్యానికి గరిష్ఠంగా రూ.78 వేల వరకు ఆర్థిక సాయం అందుతుందని పేర్కొన్నారు. పథకంపై ప్రజలు అవగాహన పెంచుకుని సద్వినియోగం చేసుకోవాలని కోరారు. ఈ కార్యక్రమంలో బాపట్ల విద్యుత్ శాఖ ఏడి శ్రీనివాసరావు, ఏ.ఈ శ్రీనివాస్ తదితరులు పాల్గొన్నారు.