సౌర విద్యుత్‌లో జిల్లా అగ్రస్థానంలో తణుకు 2,110 కుటుంబాలకు లబ్ధి.. 6.7 మెగావాట్ల సౌర విద్యుత్ సామర్థ్యం రూ.17 కోట్ల మేర ఆర్థిక ప్రయోజనం పర్యావరణ పరిరక్షణకు సౌరశక్తే ప్రత్యామ్నాయం: ఎమ్మెల్యే ఆరిమిల్లి రాధాకృష్ణ
తణుకు, సూర్య న్యూస్ : సౌర విద్యుత్ వినియోగంలో తణుకు నియోజకవర్గం పశ్చిమగోదావరి జిల్లాలో ప్రథమ స్థానంలో నిలిచిందని ఎమ్మెల్యే ఆరిమిల్లి రాధాకృష్ణ వెల్లడించారు. నియోజకవర్గవ్యాప్తంగా ఇప్పటివరకు 2,110 కుటుంబాలు తమ ఇళ్లపై సోలార్ విద్యుత్ వ్యవస్థలను ఏర్పాటు చేసుకున్నాయని, వీటి ద్వారా 6.7 మెగావాట్ల సౌర విద్యుత్ సామర్థ్యం అందుబాటులోకి వచ్చిందని తెలిపారు. ఈ పథకం ద్వారా ప్రజలకు సుమారు రూ.17 కోట్ల మేర ఆర్థిక ప్రయోజనం చేకూరిందన్నారు.మంగళవారం తణుకు మున్సిపల్ కార్యాలయంలో నిర్వహించిన పీఎం సూర్య ఘర్ సేవా సేతు అభియాన్ కార్యక్రమాన్ని ఎమ్మెల్యే ప్రారంభించారు. ఈ సందర్భంగా ఆయన మాట్లాడుతూ సంప్రదాయ విద్యుత్ వనరులపై ఆధారపడటాన్ని తగ్గించడంతో పాటు పర్యావరణ పరిరక్షణకు సౌర విద్యుత్ వినియోగం ఎంతగానో దోహదపడుతుందన్నారు.ప్రధానమంత్రి నరేంద్ర మోదీ నేతృత్వంలోని కేంద్ర ప్రభుత్వం అమలు చేస్తున్న పీఎం సూర్య ఘర్ ముఫ్త్ బిజిలీ యోజన సామాన్య, మధ్యతరగతి కుటుంబాలకు ఆర్థికంగా ఊరటనిస్తోందని పేర్కొన్నారు. ఇంటి పైకప్పులపై సోలార్ ప్యానెళ్ల ఏర్పాటుకు కేంద్ర ప్రభుత్వం అందిస్తున్న రాయితీలను ప్రజలు సద్వినియోగం చేసుకోవాలని సూచించారు.సౌర విద్యుత్ వినియోగంలో జిల్లా స్థాయిలో తణుకు అగ్రస్థానంలో నిలవడం అభినందనీయమని, ఈ విజయాన్ని మరింత ముందుకు తీసుకెళ్లాల్సిన బాధ్యత అందరిపైనా ఉందన్నారు. పథకంపై ప్రతి ఇంటికీ అవగాహన కల్పించేలా అధికారులు ప్రత్యేక చర్యలు చేపట్టాలని సూచించారు. విద్యుత్ బిల్లుల భారం తగ్గించుకోవడంతో పాటు స్వచ్ఛమైన ఇంధన వినియోగాన్ని పెంపొందించేందుకు ప్రతి కుటుంబం సౌరశక్తి వైపు అడుగులు వేయాలని ఎమ్మెల్యే ఆరిమిల్లి రాధాకృష్ణ పిలుపునిచ్చారు.
రిపోర్టర్: అనుకుమార్..తణుకు పశ్చిమగోదావరి జిల్లా,
