సర్పంచ్ ఎన్నికలకు టీడీపీ శ్రేణులు సమాయత్తం

సూర్య స్టేట్ బ్యూరో.

గిద్దలూరు: రాబోయే గ్రామ పంచాయతీ సర్పంచ్ ఎన్నికల నేపథ్యంలో గిద్దలూరు నియోజకవర్గంలో రాజకీయ కార్యకలాపాలు ఊపందుకున్నాయి. గిద్దలూరు పట్టణంలోని తెలుగుదేశం పార్టీ కార్యాలయంలో ఎమ్మెల్యే ముత్తుముల అశోక్ రెడ్డి ఆధ్వర్యంలో నియోజకవర్గంలోని ఆరు మండలాలకు చెందిన కూటమి నాయకులు, కార్యకర్తలతో విస్తృత స్థాయి సమీక్ష సమావేశం నిర్వహించారు. ఈ సందర్భంగా ఎమ్మెల్యే అశోక్ రెడ్డి మాట్లాడుతూ.. రాబోయే సర్పంచ్ ఎన్నికలను దృష్టిలో ఉంచుకుని ప్రతి గ్రామ పంచాయతీలో స్థానిక పరిస్థితులు, ప్రజల అభిప్రాయాలు, అభ్యర్థుల ప్రజాదరణను పరిగణనలోకి తీసుకొని సమర్థులైన అభ్యర్థులను ఎంపిక చేయాలని సూచించారు. కూటమి నాయకులు, కార్యకర్తలు సమన్వయంతో పనిచేస్తూ గ్రామస్థాయిలో పార్టీ బలోపేతానికి కృషి చేయాలని దిశానిర్దేశం చేశారు. కూటమి ప్రభుత్వం అమలు చేస్తున్న సంక్షేమ పథకాలు, గ్రామీణ ప్రాంతాల్లో చేపడుతున్న అభివృద్ధి కార్యక్రమాలను ప్రజల్లోకి తీసుకెళ్లాలని, ప్రతి గ్రామంలో నాయకులు, కార్యకర్తలు బాధ్యతాయుతంగా వ్యవహరిస్తూ ఎన్నికల కార్యాచరణను సమర్థవంతంగా ముందుకు తీసుకెళ్లాలని తెలిపారు. ఆరు మండలాల పరిధిలోని ప్రతి గ్రామ పంచాయతీపై ప్రత్యేక దృష్టి సారించి, నాయకులు, కార్యకర్తలు ఐక్యతతో ప్రజల సమస్యల పరిష్కారం, గ్రామాల అభివృద్ధి కోసం పనిచేయాలని ఎమ్మెల్యే అశోక్ రెడ్డి పిలుపునిచ్చారు.