సమరానికి జనసేన సై..

రాబోయే స్థానిక సంస్థల ఎన్నికలను అత్యంత ప్రతిష్టాత్మకంగా తీసుకున్న జనసేన పార్టీ, క్షేత్రస్థాయిలో పార్టీని బలోపేతం చేసేందుకు సమగ్ర వ్యూహంతో ముందుకుసాగుతోంది. ఈ నేపధ్యంలో రాష్ట్రంలోని అన్ని ప్రాంతాల్లో సమన్వయం పెంచేందుకు ప్రత్యేకంగా స్థానిక ఎన్నికల కోఆర్డినేషన్ కమిటీలను ఏర్పాటు చేయాలని నిర్ణయించింది.

రాష్ట్రంలోని మొత్తం 25 పార్లమెంట్ స్థానాలతో పాటు 175 అసెంబ్లీ నియోజకవర్గాల వ్యాప్తంగా ఈ కమిటీలను ఏర్పాటు చేయనున్నారు. పార్టీ అధినేత, డిప్యూటీ సీఎం పవన్ కళ్యాణ్ స్వీయ పర్యవేక్షణలోనే ప్రత్యేక అడ్‌హాక్ కమిటీలు పనిచేయనున్నాయి. ఈ కమిటీలు క్షేత్రస్థాయి నుంచి వాస్తవ పరిస్థితులు, సమాచారాన్ని సేకరించి నివేదికలను సిద్ధం చేసి, స్థానిక ఎన్నికల కో-ఆర్డినేషన్ కేంద్ర కమిటీ ద్వారా అధ్యక్షుడికి అందిస్తాయి. స్థానిక ఎన్నికల్లో అభ్యర్థుల ఎంపిక, క్షేత్రస్థాయి ప్రచారం, మరియు పొత్తుల సమన్వయం సులభతరం చేసేందుకే ఈ భారీ స్థాయి కమిటీల ఏర్పాటు ప్రక్రియ చేపట్టినట్లు జనసేన వర్గాలు వెల్లడించాయి.