దుగరాజపట్నంలో షిప్‌ బిల్డింగ్‌ సెంటర్‌ ఏర్పాటు చేయండి
సూర్య న్యూఢిల్లీ డెస్క్: ఆంధ్రప్రదేశ్‌లో సముద్ర ఆధారిత ఆర్థిక కార్యకలాపాలను (బ్లూ ఎకానమీ) మరింత విస్తరించేందుకు కేంద్ర ప్రభుత్వం పూర్తిస్థాయిలో సహకరించాలని ముఖ్యమంత్రి నారా చంద్రబాబు నాయుడు కోరారు. తన ఢిల్లీ పర్యటనలో భాగంగా కేంద్ర ఓడరేవులు, షిప్పింగ్, జలమార్గాల శాఖ మంత్రి శర్బానంద సోనోవాల్‌తో ముఖ్యమంత్రి భేటీ అయ్యారు. ఈ సందర్భంగా రాష్ట్రంలో పోర్టు ఆధారిత మౌలిక వసతుల కల్పన, తీరప్రాంత పారిశ్రామికాభివృద్ధికి సంబంధించిన కీలక ప్రతిపాదనలను కేంద్ర మంత్రి దృష్టికి తీసుకువెళ్లారు.
ఆంధ్రప్రదేశ్ పునర్వ్యవస్థీకరణ చట్టంలో పేర్కొన్న అంశాలను ప్రస్తావిస్తూ.. తిరుపతి జిల్లా దుగరాజపట్నంలో అత్యాధునిక షిప్‌ బిల్డింగ్‌ సెంటర్‌ను (ఓడల నిర్మాణ కేంద్రాన్ని) ఏర్పాటు చేయాలని చంద్రబాబు ప్రత్యేకంగా విజ్ఞప్తి చేశారు. దేశంలో రెండో అతిపెద్ద సుదీర్ఘ తీరప్రాంతం కలిగిన ఆంధ్రప్రదేశ్‌లో భారీ ఓడల నిర్మాణం, మరమ్మతుల రంగానికి అపార అవకాశాలు ఉన్నాయని, ఇందుకు కేంద్రం చొరవ తీసుకుని ప్రాజెక్టును పట్టాలెక్కించాలని కోరారు. తద్వారా రాష్ట్రంలో వేలాది మంది స్థానిక యువతకు ఉపాధి అవకాశాలు లభించడంతో పాటు తీరప్రాంత ఆర్థికాభివృద్ధి పరుగులు పెడుతుందని వివరించారు.
అలాగే రాష్ట్రంలో కొనసాగుతున్న పోర్టుల అనుసంధానం, లోతట్టు జలరవాణా (ఇన్‌ల్యాండ్ వాటర్‌వేస్), తీరప్రాంత కారిడార్ల అభివృద్ధికి కేంద్ర సహాయ సహకారాలు అందించాలని సీఎం కోరారు. దీనిపై కేంద్ర మంత్రి శర్బానంద సోనోవాల్ సానుకూలంగా స్పందిస్తూ, ఏపీ ప్రభుత్వం సమర్పించిన ప్రతిపాదనలను పరిశీలించి తగిన చర్యలు తీసుకుంటామని హామీ ఇచ్చారు.
