రాహుల్ గాంధీపై కేంద్ర మంత్రి కిషన్ రెడ్డి తీవ్ర ధ్వజం: రాజ్యాంగ సంస్థల విశ్వసనీయతను దెబ్బతీస్తున్నారంటూ మండిపాటు!
న్యూఢిల్లీ :కాంగ్రెస్ అగ్రనేత రాహుల్ గాంధీ వైఖరిపై కేంద్ర బొగ్గు, గనుల శాఖ మంత్రి జి. కిషన్ రెడ్డి ఢిల్లీ వేదికగా తీవ్రస్థాయిలో విమర్శలు గుప్పించారు. స్వార్థ రాజకీయ ప్రయోజనాల కోసమే రాహుల్ గాంధీ దేశంలోని అత్యున్నత రాజ్యాంగ సంస్థలపై లేనిపోని ఆరోపణలు చేస్తూ, వాటి విశ్వసనీయతను దెబ్బతీసేందుకు కుట్ర పన్నుతున్నారని ఆయన మండిపడ్డారు.
ప్రజాస్వామ్యంలో ప్రజలు ఇచ్చిన తీర్పును గౌరవించడం కాంగ్రెస్ పార్టీకి మొదటినుంచీ అలవాటు లేదని కిషన్ రెడ్డి ఎద్దేవా చేశారు. ఎన్నికల్లో వరుస పరాజయాలను జీర్ణించుకోలేక, విదేశీ వేదికలపై సైతం భారతదేశ ప్రతిష్ఠను దిగజార్చేలా రాహుల్ వ్యాఖ్యలు చేయడం బాధ్యతారాహిత్యమని దుయ్యబట్టారు. స్వదేశంలోనూ, విదేశాల్లోనూ దేశ ప్రతిష్ఠకు భంగం కలిగించే చర్యలను మానుకుని, ఇప్పటికైనా ప్రజాతీర్పును రాహుల్ గాంధీ శిరసావహించాలని కేంద్ర మంత్రి ఘాటుగా హితవు పలికారు.
