రేణిగుంటలో ఓటర్ స్లిప్పుల బీఎల్వోలు ఇవ్వలేదని ఓటర్ల ఆగ్రహం..

రేణిగుంట మేజర్ న్యూస్: రేణిగుంట మండలంలో ఎంపీటీసీ, జడ్పీటీసీ ఎన్నికల నేపథ్యంలో ఓటర్ స్లిప్పుల పంపిణీ వ్యవహారం వివాదాస్పదంగా మారింది. పోలింగ్ సమయం సమీపిస్తున్నప్పటికీ బూత్ లెవల్ అధికారులు (బీఎల్వోలు) తమకు ఓటర్ స్లిప్పులు అందించలేదని పలువురు ఓటర్లు ఆగ్రహం వ్యక్తం చేస్తున్నారు. ఈ విషయంపై సంబంధిత అధికారులకు ఫిర్యాదు చేసినా పట్టించుకోవడం లేదని ఆరోపిస్తున్నారు. ఓటు హక్కు వినియోగించుకునేందుకు పోలింగ్ కేంద్రాల వివరాలు తెలుసుకోవడంలో ఇబ్బందులు ఎదురవుతున్నాయని వాపోతున్నారు.  మండలవ్యాప్తంగా ఓటర్ స్లిప్పుల పంపిణీ సక్రమంగా జరగకపోవడానికి కారణమేమిటి? ఎన్నికల అధికారులు పర్యవేక్షణ చేస్తున్నారా? బీఎల్వోల పనితీరును సమీక్షిస్తున్నారా..? అంటూ ఓటర్లు ప్రశ్నిస్తున్నారు. ఎన్నికల నిర్వహణపై ప్రత్యేక దృష్టి సారించిన అధికారులు ఓటర్ స్లిప్పుల పంపిణీని ఎందుకు విస్మరించారన్న విమర్శలు వ్యక్తమవుతున్నాయి. ఇప్పటికైనా ఉన్నతాధికారులు స్పందించి ఓటర్లకు ఎదురవుతున్న ఇబ్బందులను పరిష్కరించాలని ప్రజలు కోరుతున్నారు.