రైతుల సంక్షేమానికి, పేదల గృహ నిర్మాణానికి అదనపు నిధులు, అనుమతులివ్వండి కేంద్రమంత్రి శివరాజ్ సింగ్ చౌహన్‌కు సీఎం చంద్రబాబు లేఖలు

అమరావతి: రాష్ట్రంలో రైతులకు మేలు చేకూర్చేలా, అర్హులైన పేదలకు ఇళ్లు మంజూరు చేసి లబ్ది కలిగించేలా కేంద్ర ప్రభుత్వ సహకారం అవసరమని సీఎం చంద్రబాబు కేంద్ర వ్యవసాయ, గ్రామీణాభివృద్ధి శాఖామంత్రి శివరాజ్ సింగ్ చౌహన్‌కు రాసిన రెండు వేర్వేరు లేఖల్లో కోరారు. రాష్ట్ర రైతాంగాన్ని ఆదుకునేందుకు అవసరమైన సహాయ సహకారాలు అందించాలని, రాష్ట్రంలో అర్హులైన ప్రతి పేద కుటుంబానికి పక్కా ఇళ్లు కల్పించేలా అదనపు ఇళ్లను మంజూరు చేయాలనే అంశాలను చంద్రబాబు కేంద్రం దృష్టికి తీసుకెళ్లారు. చొరవ తీసుకుని, నిధుల విడుదల, అవసరమైన అనుమతుల ప్రక్రియ వేగవంతం అయ్యేలా అధికారులను ఆదేశించాలని లేఖలో  శివరాజ్ సింగ్ చౌహన్‌కు విజ్ఞప్తి చేశారు.