జాతీయ స్థాయి మేళాకి నారాయణపేట విద్యార్థి ఎంపిక

నారాయణపేట, సూర్యన్యూస్ : 
ఆంధ్రప్రదేశ్ రాష్ట్రం, విజయవాడ సమీపంలోని నూతక్కిలో గత మూడు రోజులుగా నిర్వహించిన దక్షిణ మధ్యక్షేత్ర గణిత, విజ్ఞాన, సంస్కృతీ మేళాలో నారాయణపేట పట్టణంలోని శ్రీ సరస్వతీ శిశు మందిర్ ఉన్నత పాఠశాల విద్యార్థి చి. ప్రవీణ్ కుమార్ అద్భుత ప్రతిభ కనబరిచాడు. తెలంగాణ, ఆంధ్రప్రదేశ్, కర్ణాటక రాష్ట్రాల శిశు మందిరాల విద్యార్థులు పాల్గొన్న ఈ పోటీల్లో విజేతగా నిలిచి, జాతీయ స్థాయికి ఎంపికయ్యాడు. నూతక్కిలోని జ్ఞాన విహార్ పాఠశాలలో జరిగిన ఈ ప్రతిష్టాత్మక మేళాలో మూడు రాష్ట్రాల నుండి ఎంపికైన ఉత్తమ విద్యార్థులు పాల్గొన్నారు. తీవ్రమైన పోటీ నెలకొన్నప్పటికీ, కిశోర వర్గ విభాగంలో నిర్వహించిన మట్టి విగ్రహాల తయారీ పోటీలో ప్రవీణ్ కుమార్ తనంసృజనాత్మకత, నైపుణ్యంతో అత్యంత ఆకర్షణీయమైన విగ్రహాలను రూపొందించి న్యాయనిర్ణేతల ప్రశంసలు అందుకున్నాడు. మూడు రాష్ట్రాల విద్యార్థులను వెనక్కి నెట్టి ఈ పోటీలో ప్రథమ స్థానాన్ని కైవసం చేసుకున్నాడు. ఈ విజయంతో ప్రవీణ్ కుమార్ అఖిల భారత (జాతీయ) స్థాయి గణిత, విజ్ఞాన, సంస్కృతీ మేళా పోటీలకు అర్హత సాధించాడు. జాతీయ స్థాయిలో జరిగే పోటీల్లో కూడా అత్యుత్తమ ప్రదర్శన కనబరిచి, పాఠశాలకు, జిల్లాకు మరియు తెలంగాణ రాష్ట్రానికి మంచి పేరు తీసుకురావాలని ఆకాంక్షిస్తున్నారు. ప్రవీణ్ కుమార్ సాధించిన ఈ విజయం పట్ల పాఠశాల ప్రధానాచార్యులు దత్తు చౌదరి, ఆచార్య బృందం, పాఠశాల కమిటీ సభ్యులు మరియు తల్లిదండ్రులు హర్షం వ్యక్తం చేశారు. అతడిని ప్రత్యేకంగా అభినందించి, జాతీయ స్థాయి పోటీల్లో విజయం సాధించాలని ఆకాంక్షించారు.

-- *రాజేష్ కుమార్, సూర్య రిపోర్టర్ నారాయణపేట*