రైతు బజార్ అక్రమ వసూళ్లపై తక్షణమే చర్యలు తీసుకోవాలి కాంగ్రెస్ డిమాండ్

రైతు బజార్ అక్రమ వసూళ్లపై తక్షణమే చర్యలు తీసుకోవాలి.. కాంగ్రెస్ పార్టీ డిమాండ్

వేంపల్లె మేజర్ న్యూస్:
స్థానిక రైతు బజార్ లో నెలకొని ఉన్న అక్రమ వసూళ్లపై ప్రభుత్వం తక్షణమే చర్యలు తీసుకోవాలని కాంగ్రెస్ పార్టీ పులివెందుల నియోజకవర్గ ఇంచార్జీ మూలంరెడ్డి దృవకుమార్ రెడ్డి డిమాండ్ చేశారు. ఆ మేరకు మంగళవారం స్థానిక పంచాయతీ కార్యాలయంలో డిప్యూటీ ఎంపిడిఓ రమణయ్య, ఇఓ కవిత లకు వినతిపత్రం అందజేశారు. అనంతరం మాట్లాడుతూ రైతులకు, వినియోగదారులకు ఉపయోగ పడే విధంగా రైతు బజార్ లను ఏర్పాటు చేశారన్నారు. అయితే వేలం పాట పాడిన కాంట్రాక్టర్ ఒక్కో మూట మీద రూ. 40, టమోటా బాక్స్ పై రూ.20 లు వసూళ్లు చేస్తున్నారని ఆరోపించారు. అలాగే రైతు బజార్ లోని చిన్న గదికి నెలకు రూ. 3 వేలు, ముందు భాగాన రోజుకు రూ.300 లు గేటు వసూలు చేస్తున్నట్లు వెల్లడించారు. ఇదంతా రైతు బజార్ కి విచ్చేసే కొనుగోలు దారులపై భారం పడుతోందన్నారు. టెండర్ పాడిన కాంట్రాక్టర్, గ్రామ పంచాయతీ కోసం రైతు బజార్ ఏర్పాటు చేసినట్లు ఉందన్నారు. ఈ విషయంపై అధికారులు స్పందించి సంబంధిత వాటిపై నివారణకు చర్యలు తీసుకోవాలని కోరారు. ఈ కార్యక్రమంలో కాంగ్రెస్ నాయకులు రామకృష్ణ, వేమయ్య, రవీంద్రారెడ్డి, వెంకటేష్, బద్రీ, ఉత్తన్న, అమర్, రాఘవయ్య, శివ తదితరులు పాల్గొన్నారు.

గండికోట షేక్ ఖదీర్, వేంపల్లె.