రబీ సాగుకు రైతులు సిద్ధం కావాలి.. :జిల్లా కలెక్టర్ డాక్టర్ ఆర్. మహేష్ కుమార్.

                                 చివరి ఆయకట్టు వరకు సాగునీరు అందించేందుకు చర్యలు..
గోదావరి డెల్టా పరిధిలో సాగునీటి సరఫరా, కాలువల మరమ్మతులు,…డ్రైనేజీ సమస్యల పరిష్కారంపై ప్రత్యేక                         దృష్టి.. వ్యవసాయానికి డిజిటల్ భరోసా.. జిల్లా కలెక్టర్ డాక్టర్ ఆర్. మహేష్ కుమార్..
అమలాపురం,మేజర్ న్యూస్ :రబీ 2026–27 సాగు సీజన్‌లో గోదావరి డెల్టా పరిధిలోని ఆయకట్టుకు సాగునీరు అందించేలా ప్రణాళికాబద్ధంగా చర్యలు చేపట్టాలని జిల్లా కలెక్టర్ డాక్టర్ ఆర్. మహేష్ కుమార్ ఇరిగేషన్ అధికారులను ఆదేశించారు. రైతులకు సాగునీటి ఇబ్బందులు తలెత్తకుండా కాలువల నిర్వహణ, పూడికతీత, అడ్డంకుల తొలగింపు, డ్రైనేజీ వ్యవస్థల పటిష్టతపై ప్రత్యేక దృష్టి సారించాలని స్పష్టం చేశారు.
శుక్రవారం అమలాపురం కలెక్టరేట్‌లోని గోదావరి భవన్‌లో నీటిపారుదల సలహా మండలి సమావేశాన్ని నీటి సంఘాల ప్రతినిధులు, సంబంధిత శాఖల అధికారులతో నిర్వహించి రబీ సాగు సన్నద్ధతపై సమీక్షించారు.
ఈ సందర్భంగా కలెక్టర్ మాట్లాడుతూ రబీ సీజన్‌లో రైతులకు అవసరమైన సాగునీటిని అందుబాటులో ఉన్న వనరులకు అనుగుణంగా సమర్థవంతంగా పంపిణీ చేయాలని తెలిపారు. చివరి ఆయకట్టు వరకు నీరు చేరేలా వంతులవారీ సరఫరా విధానాన్ని సమన్వయంతో అమలు చేయాలని తెలిపారు
తాగునీటి చెరువులకు ప్రాధాన్యత :
జిల్లాలోని 44 తాగునీటి చెరువుల్లో ప్రస్తుతం సుమారు 50 శాతం నీరు మాత్రమే అందుబాటులో ఉందని ఆర్‌డబ్ల్యూఎస్ ఎస్‌ఈ సమావేశంలో వివరించారు. దీనిపై కలెక్టర్ స్పందిస్తూ సాగునీటి సరఫరా సమయంలోనే అవసరమైన నీటిని సేకరించి, జిల్లాలోని మొత్తం 44 చెరువులను పూర్తిస్థాయిలో నింపి తాగునీటి భద్రతకు ప్రాధాన్యత ఇవ్వాలని ఆదేశించారు.రైతులకు సాగునీటి భరోసాతో పాటు డిజిటల్ గుర్తింపు, వ్యవసాయ సేవలు సమర్థవంతంగా అందేలా అన్ని శాఖలు సమన్వయంతో పనిచేయాలని కలెక్టర్ స్పష్టం చేశారు.
ఈ సమావేశంలో ధవళేశ్వరం ఇరిగేషన్ ఎస్‌ఈ, వ్యవసాయ శాఖ జేడీ ఎం. రామారావు, ఇరిగేషన్ అధికారులు, నీటి సంఘాల ప్రతినిధులు, వివిధ డెల్టా ప్రాజెక్టు కమిటీల చైర్మన్లు, సంబంధిత శాఖల అధికారులు పాల్గొన్నారు.