రాత్రంతా చీకట్లోనే కోనసీమ జిల్లా.. స్తంభించిన విద్యుత్, రవాణా వ్యవస్థలు

అమలాపురం, మేజర్ న్యూస్ :‘అర్నబ్’ పెను తుఫాను ప్రభావంతో డాక్టర్ బి.ఆర్. అంబేద్కర్ కోనసీమ జిల్లా అతలాకుతలమైంది. మంగళవారం సాయంత్రం నుంచి ఈదురుగాలులతో కూడిన కుండపోత వర్షం విరుచుకుపడటంతో జిల్లావ్యాప్తంగా తీవ్ర విపత్తు వాతావరణం నెలకొంది.

భారీ ఈదురుగాలుల ధాటికి పలు ప్రాంతాల్లో విద్యుత్ స్తంభాలు నేలకొరగడంతో పాటు ప్రధాన విద్యుత్ వైర్లు తెగిపడ్డాయి. దీంతో నిన్న సాయంత్రం నుంచే జిల్లావ్యాప్తంగా విద్యుత్ సరఫరా నిలిచిపోయి, రాత్రంతా కోనసీమ ప్రాంతం అంధకారంలోనే గడిపింది.

మరోవైపు, రోడ్లకు అడ్డంగా భారీ వృక్షాలు, చెట్ల కొమ్మలు విరిగిపడటంతో పలు మార్గాల్లో రవాణా వ్యవస్థ పూర్తిగా స్తంభించింది. సమాచారం అందుకున్న ఎన్‌డీఆర్‌ఎఫ్ (NDRF) బృందాలు, పోలీసు సహాయక సిబ్బంది తక్షణమే రంగంలోకి దిగి రెస్క్యూ చర్యలు చేపట్టారు. ఆధునిక కట్టర్ల సహాయంతో రహదారులపై పడిన చెట్లను తొలగిస్తూ రవాణాను పునరుద్ధరించేందుకు ముమ్మరంగా శ్రమిస్తున్నారు. గాలుల ఉధృతి తగ్గిన వెంటనే యుద్దప్రాతిపదికన విద్యుత్ పునరుద్ధరణ పనులు చేపడతామని అధికారులు తెలిపారు.