రాజాంలో మున్సిపల్ సమరం! *20 ఏళ్ల నిరీక్షణకు తెర *

(విజయనగరం బ్యూరో, సూర్య)

రాజాం మున్సిపాలిటీలో మళ్లీ ఎన్నికల సందడి మొదలుకానుంది. సుమారు రెండు దశాబ్దాలుగా ఎన్నికలకు నోచుకోని ఈ మున్సిపాలిటీలో ఎట్టకేలకు ప్రజాప్రతినిధుల పాలనకు మార్గం సుగమమవుతోంది. కోర్టు వివాదాలు పరిష్కారం కావడంతో ఈ నెల 26న రాష్ట్రంలోని 23 పట్టణ స్థానిక సంస్థలకు ఎన్నికలు నిర్వహించేందుకు రాష్ట్ర ఎన్నికల సంఘం నిర్ణయం తీసుకుంది. ఇందులో విజయనగరం జిల్లాలోని రాజాం మున్సిపాలిటీ కూడా ఉండటంతో స్థానికంగా రాజకీయ చర్చ మొదలైంది.
32 వార్డులు.. 36,786 మంది ఓటర్లు!
రాజాం నగర పంచాయతీగా ఏర్పడినప్పుడు 20 వార్డులు ఉండేవి. అనంతరం 2023లో థర్డ్ గ్రేడ్ మున్సిపాలిటీగా అప్‌గ్రేడ్ కావడంతో వార్డుల సంఖ్య 24కు చేరింది. తాజాగా చేపట్టిన వార్డుల పునర్విభజనతో ఈ సంఖ్య 32కు పెరిగింది. మొత్తం 32 వార్డుల్లో 36,786 మంది ఓటర్లు తమ ఓటు హక్కును వినియోగించుకోనున్నారు. వీరి కోసం 49 పోలింగ్ కేంద్రాలను ఏర్పాటు చేశారు. గత సార్వత్రిక ఎన్నికల సమయంలో ఉన్న పోలింగ్ కేంద్రాల కంటే అదనంగా ఎనిమిది కేంద్రాలను గుర్తించారు. పెరిగిన ఓటర్ల సంఖ్యకు అనుగుణంగా ఈ ఏర్పాట్లు చేశారు.
ఎమ్మెల్యే కోండ్రుకు కీలకం!
రాజాం మున్సిపాలిటీ ఎన్నికలు ప్రస్తుత ఎమ్మెల్యే, మాజీ మంత్రి కోండ్రు మురళీమోహన్‌కు రాజకీయంగా ప్రాధాన్యత సంతరించుకున్నాయి. రాజాం ఆయన సొంత నియోజకవర్గ కేంద్రం కావడం, టీడీపీకి ఇక్కడ రాజకీయంగా పట్టును నిరూపించుకోవాల్సిన పరిస్థితి ఉండటంతో ఈ ఎన్నికలను ప్రతిష్ఠాత్మకంగా తీసుకునే అవకాశం ఉంది. మరోవైపు వైసీపీ కూడా పట్టణంలో తన బలాన్ని చాటుకునేందుకు వ్యూహాలు సిద్ధం చేయాల్సి ఉంటుంది. జనసేన, బీజేపీల పాత్ర కూడా ఎన్నికల రాజకీయాల్లో చర్చనీయాంశం కానుంది.
రెండు దశాబ్దాలుగా ప్రత్యేకాధికారి పాలన!
2005 అక్టోబరులో రాజాం నగర పంచాయతీగా ఏర్పాటైంది. అయితే మున్సిపాలిటీలో విలీనమైన గ్రామాల విషయంలో తలెత్తిన వివాదాలు న్యాయస్థానాలకు చేరడంతో ఎన్నికల నిర్వహణకు ఆటంకాలు ఏర్పడ్డాయి. ఫలితంగా ప్రజలు ఎన్నుకున్న పాలకవర్గం లేకుండానే ప్రత్యేకాధికారి పాలన కొనసాగుతూ వచ్చింది. నాలుగు పాలకవర్గాల కాలపరిమితి పూర్తయి ఉండాల్సిన సమయంలోనూ ఎన్నికలు జరగకపోవడం రాజాం ప్రత్యేకతగా నిలిచింది.
ఎన్నికలతో మారనున్న రాజకీయ ముఖచిత్రం!
ఇన్నాళ్లూ ఎన్నికలు లేకపోవడంతో రాజకీయ పార్టీలకు స్థానికంగా ప్రజాబలాన్ని ప్రత్యక్షంగా పరీక్షించుకునే అవకాశం లేకుండా పోయింది. ఇప్పుడు 32 వార్డుల్లో ఎన్నికలు జరగనుండటంతో ఆశావహుల సంఖ్య పెరిగే అవకాశం ఉంది. వార్డుల వారీగా అభ్యర్థుల ఎంపిక, సామాజిక సమీకరణాలు, స్థానిక సమస్యలు, పార్టీల మధ్య పొత్తులు, అంతర్గత పోటీలు కీలకం కానున్నాయి.
ముఖ్యంగా పట్టణంలో తాగునీరు, పారిశుధ్యం, డ్రైనేజీ, రహదారులు, వీధి దీపాలు, పట్టణాభివృద్ధి వంటి అంశాలు ఎన్నికల ప్రచారంలో ప్రాధాన్యత సంతరించుకునే అవకాశం ఉంది.
మొత్తానికి రెండు దశాబ్దాల నిరీక్షణకు తెరదించుతూ రాజాం మున్సిపాలిటీలో ఎన్నికల ప్రక్రియ ప్రారంభం కానుండటంతో పట్టణ రాజకీయాలు మరోసారి వేడెక్కనున్నాయి. ఎమ్మెల్యే కోండ్రు మురళీమోహన్ సొంత నియోజకవర్గ కేంద్రంలో జరగనున్న ఈ ఎన్నికలు స్థానిక రాజకీయాల్లో ఎలాంటి పరిణామాలకు దారితీస్తాయన్నది ఆసక్తికరంగా మారింది.